Respýblıkanyń sýarylmaıtyn egistik jerindegi qarashirigi tómen jerler 63,5, al sýarmaly egistikterinde 98,7 paıyzdy quraıdy - Ó.Ózbekov
ASTANA. 11 mamyr. QazAqparat /Marlan Jıembaı/ - Respýblıkanyń sýarylmaıtyn egistik jerindegi qarashirigi tómen jerler 63,5 paıyzdy,
al sýarmaly egistikterinde 98,7 paıyzdy quraıdy. Bul týraly búgin Jer resýrstaryn basqarý agenttiginiń tóraǵasy Ómirzaq Ózbekov QR Parlamenti Senatynyń depýtattarymen kezdesý barysynda aıtty.
Agenttik tóraǵasynyń aıtýynsha, ótkn jyly jer kadastry talaptaryna sáıkes jer resýrstarynyń sapalyq jaı-kúıin anyqtaý maqsatynda 1,2 mıllıon gektar topyraqty zertteý jáne topyraq bonıtırovkasyn anyqtaý, 850 myń gektarǵa geobotanıkalyq zertteý jumystary júrigizildi. Jalpy alǵanda qazirgi kezde ár jyldary júrgizilgen aýmaǵy 187 mıllıon gektar jerlerdiń topyraǵyn zertteý jumystarynyń jáne 153 mıllıon gektar aýmaqtaǵy mal azyǵy alqaptaryna geobotanıkalyq zertteý materıaldary bar.
«Alaıda materıaldardyń eskirýine baılanysty tıisinshe 66,1 mıllıon jáne 42 mıllıon gektar alqap jańa zertteý jumystaryn júrgizýdi qajet etedi. Sonymen birge ótken jyly 1 mıllıon gektar egisti alqapqa agrohımııalyq zertteý jumystary júrgizildi», - dedi Ó.Ózbekov.
Bul rette nazar aýdaratyn másele 2000-2010 jyldary 17,7 mıllıon gektar egistik alqaptarynda júrigizilgen agrohımııalyq zertteýlerdiń nátıjesi boıynsha respýblıkanyń sýarylmaıtyn egistik jerindegi qarashirigi tómen jerler 63,5 paıyzdy, al sýarmaly egistikter boıynsha 98,7 paıyzdy qurady.
Onyń paıymdaýynsha, topyraq qunarlyǵynyń tómendeýine tabıǵı faktorlardan bólek mıneraldyq jáne organıkalyq tyńaıtqyshtardyń qoldanylmaýy, agrotehnıkalyq talaptardyń saqtalmaýy jáne de ǵylymı negizdelgen aýyspaly egis júıeleriniń bolmaýy da basty sebep bolyp otyr. Máselen, 1990 jyly 1 gektar egistik alqapta berilgen tyńaıtqyshtar 19,1 kelini, 2000 jyly 0,7 kelini, al 2010 jyly 4,14 kelini qurady.
