Respýblıkanyń soltústigi men batysynda qar jaýady
ASTANA. 13 qańtar. QazAqparat - Qazaqstan aýmaǵynyń soltústik, soltústik-batys jáne ońtústik bóliginiń shetkeri aımaqtarynyń aýa raıyna aýa aǵyndary áser etip, keı jerlerde qar jaýady, dep habarlady QR TJM baspasóz qyzmeti Qazgıdromet málimetterine silteme jasap.
«Qazaqstan aýmaǵynyń soltústik, soltústik-batys jáne ońtústik bóliginiń shetkeri aımaqtarynyń aýa raıyna aýa aǵyndary áser etip, keı jerlerde qar jaýady. Respýblıkanyń qalǵan aýmaǵy joǵary atmosferalyq qysym aıasynda bolady», - delingen vedomstvo aqparatynda.
Almaty oblysynyń keı jerlerin tuman basyp, Jalańashkól aýdanynda ekpini sekýndyna 20-25, keıde 30 metrden astam jyldamdyqpen jel soǵady.
Ońtústik Qazaqstan, Jambyl oblystarynyń keı jerlerinde tuman túsedi. Pavlodar oblysynda jel qýaty sekýndyna 18 metrge deıin jetpek.
Sonymen qatar taıaýdaǵy táýlikterde respýblıkanyń sý nysandarynda muz qatý úrdisi júrip, keıbir ózenderde muz keptelisi saldarynan sý deńgeıiniń kóterilýi múmkin.
