Respýblıkanyń orta mektepterinde basqa elden kelgen 20 myńnan astam bala bilim alýda
ASTANA. QazAqparat - Respýblıkanyń orta mektepterinde basqa elden kelgen 20 myńnan astam bala bilim alýda. Bul týraly QR Prezıdenti janyndaǵy Adam quqyqtary jónindegi komıssııanyń keńeıtilgen otyrysynda Bilim jáne ǵylym mınıstri Aslan Sárinjipov málim etti.
«Elimizde Qazaqstan Respýblıkasynda turaqty turatyn azamattyǵy joq tulǵalardyń jáne shetel azamattarynyń bilim alýdaǵy konstıtýtsııalyq quqyqtary qamtamasyz etilgen. Mektepterde basqa elderden kelgen 20 600 bala bilim alýda», - dedi ol.
Sonymen qatar mınıstrdiń atap ótýinshe, respýblıkanyń orta bilim beretin mektepterinde shetelderden kóship kelgen qandastarymyzdyń 11 myń balasy oqyp jatyr. Olardyń ishinde 4700 bala bastaýysh, al 6300 bala negizgi mektepterde bilim alýda.
«Respýblıkada sany az ulystar úshin ana tilin meńgerýge jaǵdaı jasalǵan. 2013-2014 oqý jylynda respýblıkada ózbek tilindegi 57, uıǵyr tilindegi 14, tájik tilindegi 2 mektep jumys istedi», - dedi A.Sárinjipov.
Onyń alǵa tartqan derekterine qaraǵanda, ózbek tilinde 78 myń, uıǵyr tilinde 14 myń, al tájik tilinde shamamen 5 myń bala oqıdy. Sonymen qatar ózbek tilinde oqytatyn synyptary bar aralas mektepter sany - 91, uıǵyr tilinde - 48, al tájik tilinde - 9.
