Respýblıkanyń kóptegen bóliginde 19 naýryz kúni jaýyn-shashyn, tuman, kóktaıǵaq bolyp, jeldiń kúsheıýi kútilýde
ASTANA. 18 naýryz. QazAqparat - Respýblıkanyń kóptegen bóligi atmosferalyq frontaldyq bólikterdiń yqpalynda bolýda, osyǵan baılanysty keıbir jerlerde jaýyn-shashyn, kóbinese jańbyr jaýady, tuman, kóktaıǵaq bolyp, jeldiń kúsheıýi kútiledi.
Bul týraly Qazgıdrometke silteme jasaǵan QR TJM-niń baspasóz qyzmetinen habarlaıdy.
Respýblıkanyń soltústik bóliginde ǵana kún raıy ashyq bolady dep kútilýde. Batys Qazaqstan oblysynda keıbir jerlerde tuman, kóktaıǵaq kútiledi, kúndiz jeldiń jyldamdyǵy 15-20 m/s-ke deıin jetedi.
Aqtóbe, Shyǵys Qazaqstan oblystarynyń keıbir jerlerinde tuman, jeldiń 15-20 m/s jyldamdyqpen soǵýy kútiledi.
Atyraý oblysynda, túnde Mańǵystaý oblysynda, kúndiz Ońtústik Qazaqstan oblysynyń keıbir jerlerinde jeldiń jyldamdyǵy 15-20 m/s-ke deıin jetedi.
Soltústik Qazaqstan oblysynyń keıbir jerlerinde tuman túsip, kóktaıǵaq bolady.
Jambyl, Qyzylorda, Qostanaı, Pavlodar oblystarynda, túnde jáne tańerteń Aqmola oblysynyń keıbir jerlerinde tuman bolady.
Almaty oblysynda túnde jáne tańerteń keıbir jerlerde tuman túsedi, Alakól kóliniń aýdanynda jeldiń 18-23 m/s-ke deıin kúsheıýi kútilýde.
Jaqyn táýlikterde Shyǵys Qazaqstan oblysynyń ózenderinde muzqabatynyń odan ári álsireýi kútiledi, muz keptelisiniń qalyptasýy, sý deńgeıleriniń kúrt kóterilýi, tasqyndar men sý basýlar bolýy múmkin.
Tarbaǵataı, Zaısan, Aıagóz, Úrjar aýdanynda betkeılik aǵynnyń qalyptasýy múmkin. Batys Qazaqstan, Atyraý, Aqtóbe jáne Qaraǵandy oblystarynyń jekelegen ózenderinde kóktemgi tasqynnyń odan ári damýy, sý deńgeıleriniń kóterilýi múmkin. Soltústik oblystardyń ózenderinde muzqatqynyń birte-birte álsireýi baıqalady.
