Respýblıkanyń keıbir óńirlerinde 1-6 gradýsqa deıin kún sýytady - 11 qyrkúıektegi aýa raıy boljamy
ASTANA. QazAqparat - Qazaqstannyń basym bóliginde burynǵysha kún ashyq bolady, eldiń batysynda, soltústik-shyǵysynda jáne shyǵysynda ǵana atmosferalyq aǵyndardyń ótýimen aýa raıynyń turaqsyz sıpaty kútiledi, keı jerlerde kún kúrkrep, jańbyr jaýady, jel kúsheıedi, dep habarlady QR ІІM TJK «Qazgıdrometke» silteme jasap.
Respýblıkanyń soltústiginde, soltústik-batysynda, shyǵysynda túnde jáne tańerteń tuman túsedi.
Mańǵystaý, Atyraý oblystarynda, kúndiz Qyzylorda, Ońtústik Qazaqstan, Jambyl oblystarynda keı jerlerde 15-20 m/s-qa deıin jel kúsheıedi, Qyzylorda oblysynda shańdy daýyl kóteriledi.
Shyǵys Qazaqstan oblysynda keı jerlerde jeldiń ekpini 15-20 m/s-qa jetedi, túnde jáne tańerteń tuman túsedi.
Qostanaı oblysynda túnde keı jerlerde tuman túsedi, kúndiz keı jerlerde jel 15-20 m/s-qa deıin kúsheıedi.
Soltústik Qazaqstan oblysynda túnde jáne tańerteń keı jerlerde tuman túsýi kútiledi.
Respýblıkanyń soltústiginde, soltústik-batysynda, shyǵysynda jáne ortalyǵynda keı jerlerde 1-6 gradýsqa deıin kún sýytady.
Respýblıkanyń ońtústiginde, ońtústik-shyǵysynda, batysynyń keı jerlerinde, soltústiginde, soltústik-batysynda, shyǵysynda jáne ortalyǵynda óte joǵary órt qaýpi saqtalady.
Taıaýdaǵy táýlikterde Syrdarııa ózeninde Ońtústik Qazaqstan jáne Qyzylorda oblysynyń ońtústigi sheginde Shardara sý qoımasynan sý kelýiniń azaıýyna baılanysty sý deńgeıi tómendeıdi. Respýblıkanyń ońtústigindegi, ońtústik-shyǵysyndaǵy jáne shyǵysyndaǵy taý ózenderinde gıdrologııalyq rejımde eleýli ózgerister bolmaıdy.
