Respýblıkanyń eksporttyq elektr energetıkalyq áleýeti ulǵaıdy - Qanat Bozymbaev
NUR-SULTAN. QazAqparat - Energııa berýshi uıymdardy irilendirýge baǵyttalǵan jumystar júrgizilýde. Bul týraly Parlament Májilisindegi Úkimet saǵatynda Energetıka mınıstri Qanat Bozymbaev málim etti, dep habarlaıdy QazAqparat tilshisi.
«Ózderińizge belgili, 2009 - 2015 jyldary «Tarıfti ınvestıtsııaǵa aıyrbastaý» baǵdarlamasy jumys istedi. Osy kezeńde generatsııa sektoryna 1 trln 052 mlrd 204 mln teńge ınvestıtsııa salyndy. Bul 1 720 MVt-ty jańǵyrtýǵa jáne 1 237 MVt jańa qýatty engizýge múmkindik berdi (jalpy 2 957 MVt). Parlamentte júrgizilgen jumystyń arqasynda 2015 jyly zań qabyldandy. Onda elektr energetıkalyq salanyń ınvestıtsııalyq tartymdylyǵyn qamtamasyz etýdiń jańa tetigi belgilendi. Osy túzetýlerge sáıkes, 2019 jyldyń 1 qańtarynan bastap, elektr energııasy naryǵymen qatar elektr qýatynyń naryǵy jumys isteı bastady», - dep eske saldy mınıstr.
Sonymen qatar ol energııa berýshi uıymdardy irilendirý úshin zań deńgeıinde talaptar belgilengenin, olar kezeń-kezeńmen engiziletinin atap ótti.
«Zań qabyldanyp, birinshi talap qoldanysqa engizilgennen keıin, memlekettik organdar energııa berýshi uıymdardy irilendirýge baǵyttalǵan is-sharalardy bastady. Máselen, búgingi tańda energııa berýshi uıymdardyń sany 162-den 152 qysqardy. Onyń ishinde 5 memlekettik kásiporyn joıyldy. Iesiz jelilerdiń uzyndyǵy tómendedi. Sondaı-aq Qazaqstan halqynyń ál-aýqaty men ómir súrý sapasyna áser etetin oń kórsetkishter baıqalady. Atap aıtsaq, sońǵy tutynýshylarǵa tarıfterdi tómendetý, elektr jelilerindegi jazataıym oqıǵalar sanyn azaıtý, monopolıster kórsetetin qyzmetter sapasyn arttyrý qamtylǵan», - dedi Qanat Bozymbaev.
Budan bólek ol shekara mańyndaǵy eldermen yntymaqtastyq jaǵdaıyna toqtaldy.
«Qazirgi ýaqytta Qazaqstannyń Birtutas elektr energetıkalyq júıesi Reseı men Ortalyq Azııa elderiniń energojúıelerimen qatarlas rejimde turaqty jumys isteıdi. Elektr energetıkasy júıesine baǵyttalǵan aýqymdy ınvestıtsııalardyń arqasynda sońǵy jyldary respýblıkanyń eksporttyq elektr energetıkalyq áleýeti ulǵaıdy. Sońǵy úsh jylda eksporttalatyn elektr energııasynyń jıyntyq kólemi 13, 8 mlrd kVtsaǵ qurady. Bul jalpy óndirý kóleminiń 4,6 paıyzyn quraıdy», - dedi vedomstvo basshysy.
