Respýblıkanyń birqatar oblystyq sottarynda «100 naqty qadam» Ult josparyn júzege asyrý máseleleri talqylandy
Keńeske Qazaqstan Respýblıkasy Joǵarǵy Sotynyń sýdıalary R. Mamyrbaev, A. Saparova, A. Qydyrbaeva, M. Shegenov, QR Joǵarǵy Sotynyń doǵarystaǵy sýdıasy A. Kravchenko jáne Astana qalalyq sotynyń sýdıasy S. Jarmuhanbetova qatysty.
Atalǵan is-sharaǵa oblystyq sot tóraǵalarynyń basshylyǵymen sot alqalarynyń, aýdandyq jáne oǵan teńestirilgen sottar tóraǵalary men sýdıalarynyń, oblystyq jáne qalalyq quqyq qorǵaý organdary basshylarynyń, shaǵyn jáne orta bıznes ókilderi qatysty.
Oblystyq sot tóraǵalary zań ústemdigin jáne sottyń ashyqtyǵy men jarııalylyǵyn odan ári qamtamasyz etýge qatysty Ult josparynyń tarmaqtaryna jan-jaqty toqtaldy. Atap aıtqanda, «Zań ústemdigin qamtamasyz etý» sheńberinde memlekettiń quqyqtyq júıesin qalyptastyratyn 19 naqty qadam qarastyrylǵan, olardyń 11 qadamy memlekettiń sot júıesin reformalaýǵa baǵyttalǵan.
Sonymen qatar, kóp uzamaı úsh býyndy sot júıesine ótý, sýdıa laýazymyna úmitkerler jasynyń 30 jasqa deıin jetkizilýi, sot isterin júrgizýge baılanysty 5 jyldan kem emes jumys ótili bolýy, kásibı daǵdysy men iskerligin tekserý úshin ahýaldyq testiler júıesin engizý, jeke kepilgerliktiń bolýy, sondaı-aq qaıta taǵaıyndalǵan sýdıalarǵa bir jyldyq synaq merziminiń engizilýi jaıynda sóz qozǵaldy.
Sot tóreligi ınstıtýty QR Prezıdenti janyndaǵy Memlekettik basqarý akademııasynyń quramynan shyǵarylyp, Joǵarǵy Sottyń quzyryna beriletin bolady. Osy oraıda, atalǵan ınstıtýtty Sot tóreligi akademııasy dep qaıta quryp, onyń sheńberinde magıstratýra, biliktilikti arttyrý jáne ǵylymı-zertteý ınstıtýttaryn qurý kózdelýde. Atalǵan tájirıbelik shara árbir magıstranttyń iskerlik kemshilikterin jedel joıýǵa jol ashady.
Buǵan qosa, beıindik oqý jáne ǵylymı-ádistemelik ortalyqtardyń bolýy sýdıalardyń biliktiligin arttyrý, sondaı-aq jeke ǵylymı zertteýler júrgizý, Joǵarǵy Sottyń qaýlylary jáne jalpy otyrystardyń usynymdary boıynsha saraptama jasaý baǵytyndaǵy jumysty júıeli túrde joǵary deńgeıde júrgizýge múmkindik beredi.
Reformalar Sot jıýrıi qyzmetine de qatysty júrgiziletin bolady. Sot jıýrıiniń quramynda biliktilik komıssııasy men tártiptik komıssııany qurý josparlanyp otyr. Jańǵyrtylǵan alqanyń quzyryna jumys istep júrgen sýdıalarǵa olardyń qyzmetiniń alǵashqy bes jáne on jyly aıaqtalǵanda, sondaı-aq joǵarǵy satydaǵy sottyń laýazymyna jarııalanǵan konkýrsqa qatysý barysynda kásibı baǵa berý máseleleri kiredi.
Joǵarǵy Sottyń sýdıalary sot júıesine qatysty aldaǵy basqa da reformalar jaıynda toqtalyp ótti. Máselen, Joǵarǵy Sotta iri ınvestorlar qatysatyn daýlardy qaraý úshin ınvestıtsııalyq alqa jáne Halyqaralyq konsýltatıvtik keńes qurý kózdelýde. Joǵarǵy Sot ókilderiniń málimetine sáıkes, atalǵan zań jobalarynyń ázirlenýi aǵymdaǵy jyldyń 1 qyrkúıegine deıin aıaqtalýy tıis.
Taǵy bir jańashyldyq dep azamattyq-quqyqtyq daýlar jónindegi sottarǵa prokýrordyń qatysýyn qysqartý máselesin aıtýǵa bolady. Prokýrordyń mindetti túrde qatysýyn tek myna jaǵdaılarda: ıaǵnı, memlekettiń múddesi qozǵalǵan jaǵdaıda sottyń nemese prokýrordyń bastamasymen, ózderin qorǵaı almaıtyn azamattarǵa qatysty daýlardy sheshý kezinde, sondaı-aq tulǵalardyń qoǵamdyq múddelerin qorǵaý qajet bolǵan jaǵdaılardada saqtaý usynylýda.
Sonymen qatar, Joǵarǵy Sot ókilderi sýdıalardyń jańa etıkalyq kodeksin ázirleý, Joǵarǵy Sot Keńesiniń qaıta qurylýy, sýdıalar men Joǵarǵy Sot qyzmetkerleri sanynyń artýy, sondaı-aq sýdıa laýazymyna úmitkerlerdi irikteý krıterıılerine naqty toqtaldy.
Keńes sońynda Joǵarǵy Sottyń kadr rezervine kandıdattardy irikteý boıynsha jasyryn saýalnama júrgizildi.
