Respýblıkanyń batysynda jańbyr jaýyp, naızaǵaı oınaıdy, kúshti jel soǵady dep kútilýde - Qazgıdromet
ASTANA. 17 shilde. QazAqparat - 18,19,20 shildede Qyzylorda oblysynda kún +35+40 gradýsqa deıin qatty ysıdy, keı jerlerde +45 gradýsqa deıin aptap ystyq bolady dep kútilýde, dep eskertedi «Qazgıdromet» RMK.
Buǵan deıin habarlanǵandaı, 16-18 shilde aralyǵynda kúndiz Aqmola oblysynda +34+39 gradýsqa deıingi ystyqtar saqtalady. 18 shildede kúndiz Qostanaı oblysynda aýa baǵamy +34+39 gradýsty kórsetedi, jekelegen jerlerde kún +42 gradýsqa deıin ysıdy.
Qazaqstannyń basym aýmaǵy antıtsıklonnyń yqpalynda bolady, erteń aýa raıy jaýyn-shashynsyz ystyq bolady, tek respýblıkanyń batysynda keı jerlerde jańbyr jaýyp, naızaǵaı oınaıdy, jel turady. Sondaı-aq qumdy daýyl turyp, keı jerlerde burshaq jaýýy yqtımal.
Atyraý, Aqtóbe, kúndiz Ońtústik Qazaqstan, Mańǵystaý oblystarynyń jekelegen aýmaqtarynda 15-20 m/s-qa deıin jel soǵady. Batys Qazaqstan oblysynda keı jerlerde jeldiń ekpini 15-20 m/s-qa deıin jetedi, qumdy daýyl turyp, burshaq jaýýy yqtımal.
Aqmola, Almaty, Jambyl, Mańǵystaý, Atyraý, Batys Qazaqstan, Soltústik Qazaqstan, Pavlodar, Qyzylorda, Aqtóbe, Qostanaı, Qaraǵandy oblystarynda, Ońtústik Qazaqstan jáne Qyzylorda oblysynyń keı jerlerinde kúnniń qatty ysýy saqtalady. Qyzylorda, Aqtóbe, Qostanaı, Qaraǵandy oblystarynda keı jerlerde synap baǵanasy joǵary temperatýrany kórsetedi.
Qyzylorda, Ońtústik Qazaqstan, Aqtóbe oblystarynda, Jambyl, Almaty, Qaraǵandy, Batys Qazaqstan oblystarynyń keı óńirlerinde tótenshe joǵary órt qaýpi saqtaldy.
Aldaǵy táýlikterde respýblıkanyń ońtústik, ońtústik-shyǵys jáne shyǵysyndaǵy taýly ózenderde sý deńgeıiniń aýytqýy baıqalady.
