Respýblıkanyń basym bóliginde qatty aıaz bolady - Qazgıdromet
ASTANA. QazAqparat - Qazaqstannyń basym bóligi 25 aqpan kúni aıazdy ári jaýyn-shashynsyz antıtsıklonnyń yqpalynda bolady. Tek soltústik pen soltústik-batysta atmosferalyq frontaldyq aǵymdardyń ótýine baılanysty aýa raıy turaqsyz bolyp, keı jerlerde qar jaýady, jel kúsheıip, boran soǵyp, tuman túsedi. Bul týraly «Qazgıdrometke» silteme jasap, QR TJM baspasóz qyzmetinen habarlady.
Aqmola jáne Soltústik Qazaqstan oblystarynda keı jerlerde boran bolady, 15-20 m/s jyldamdyqpen jel soǵady. Qostanaı oblysynda túnde jáne tańerteń keı jerlerde tuman túsip, tańerteń jáne kúndiz 15-20 m/s jyldamdyqpen jel soǵyp, boran bolady. Qyzylorda, Mańǵystaý, Atyraý oblystarynda da 15-20 m/s jyldamdyqpen jel soǵady dep kútilýde. Jambyl, Ońtústik Qazaqstan, túnde Qaraǵandy, túnde jáne tańerteń Shyǵys Qazaqstan oblystarynda keı jerlerde tuman túsýi múmkin.
Almaty oblysynyń keı jerlerinde túnde óte qatty aıaz bolady dep kútiledi. Ońtústik Qazaqstan oblysynyń keı jerlerinde qatty aıaz bolady, sondaı-aq qıyr soltústikte de aıaz kúsheıedi. Jambyl men Qaraǵandy oblystarynyń keı jerlerinde de qatty aıaz bolady dep boljanýda.
