Respýblıkanyń basym aýmaǵynda joǵary temperatýra saqtalyp, jaýyn-shashyn kólemi tıisti normadan tómen bolmaq
ASTANA. Tamyzdyń 9-y. QazAqparat /Rýslan Ǵabbasov/ - Qazirgi kezde Qazaqstan aýmaǵyndaǵy tabıǵı órtke baılanysty jaǵdaı qıyn.
Bul týraly búgin Úkimette ótken selektorlyq keńeste QR Tótenshe jaǵdaılar vıtse-mınıstri Valerıı Petrov málim etti.
Bıylǵy jyldyń 7 aıynda memlekettik orman qory aýmaǵynda 363 órt tirkeldi. Onyń ishinde 120-sy Aýyl sharýashylyǵy mınıstrligine qarasty vedomstvolardyń aıryqsha baqylaýyndaǵy tabıǵı aýmaqtarynda, al 243-i jergilikti atqarý organdarynyń ormandy alqaptarynda bolǵan. V. Petrovtyń sózine qaraǵanda, osy órttiń saldarynan tilsiz jaý sharpyǵan aýmaqtyń jalpy aýdany 4 myń gektar jerdi qamtyǵan, sondaı-aq materıaldyq shyǵyn 35 mıllıon teńgeden astam qarjyny quraıdy. «Ótken jyldyń osy kezeńindegi kórsetkishterimen salystyrǵanda Qazaqstan ormandaryndaǵy órt sany 10 paıyzǵa tómendedi, al órttiń aýmaǵy 19 paıyzǵa ósti», - dedi vıtse-mınıstr. Respýblıkanyń jazyq jerlerinde jalpy aýmaǵy 55 myń gektar alqapqa jaıylǵan 169 órt tirkeldi. Osynyń saldarynan kelgen shyǵyn 4 mıllıon teńgeni quraıdy.
«Jalpy tirkelgen órt sany 17 paıyzǵa, al onyń aýmaǵy 10 paıyzǵa ósti. Órt saldarynan 2 adam zardap shekti jáne 200-den astam usaq mal basy qyrylǵan, sondaı-aq osy aýdandardaǵy ósimdikter men haıýanattar dúnıesine aıtarlyqtaı zııan keltirildi», - dedi V. Petrov. Onyń aıtýynsha, ormandy dalaly alqaptardaǵy órtterdiń basym bóligi tamyz-qyrkúıek aılaryna tıesili. «Qazgıdromettiń» málimeti boıynsha tamyzda jáne qyrkúıektiń birinshi jartysynda respýblıkanyń basym aýmaǵynda joǵary temperatýra saqtalmaq, al jaýyn-shashyn kólemi tıisti normadan tómen bolmaq.
