Respýblıkanyń ár óńirinde oryn alǵan órtten 4 adam qaza taýyp, 3 azamat aýrýhanaǵa jetkizildi - TJM
ASTANA. Jeltoqsannyń 26-sy. QazAqparat - Respýblıkanyń ár óńirinde oryn alǵan órtten 4 adam qaza taýyp, 3 azamat aýrýhanaǵa jetkizilgen.
Bul aqparatty QR TJM-niń baspasóz qyzmeti taratyp otyr.
Atap aıtqanda, elordanyń «Jýravýshka» baqshalyq qoǵamynda shyqqan órtti sóndirý barysynda bir áıeldiń denesi tabylyp, 3 azamat aýrýhanaǵa jetkizilgen. Tilsiz jaý qalalyq tótenshe jaǵdaılar departamenti órt sóndirý qyzmetiniń jeke quramdaǵy 10 mamany men 2 tehnıkasynyń kúshimen aýyzdyqtalǵan.
Al, Qaraǵandy oblysynyń Shet aýdanyna qarasty Aqshataý aýylynda jeke turǵyn úıdiń 40 sharshy metr aýmaǵyn qamtyǵan qyzyl jalyndy sóndirý barysynda eki adamnyń máıiti tabylǵan. Sonymen qatar osy oblystyń Nura aýdanyna qarasty Kıevka aýylynda da jeke turǵyn úı órt qushaǵyna oranǵan. Oblystyq tótenshe jaǵdaılar departamenti órt sóndirý qyzmetiniń jeke quramdaǵy 3 mamany men 1 tehnıkasynyń kúshimen aýyzdyqtalǵan órtten 41 jastaǵy azamattyń denesi tabyldy.
