Respýblıkamyzdyń 3 qalasy men 4 aýylynda sý men káriz qyzmetterine tarıfter ózgerdi
ASTANA. 4 jeltoqsan. QazAqparat - 1 jeltoqsannan bastap respýblıkamyzdyń 3 qalasynda jáne 4 aýylynda sý men káriz qyzmetterine tarıfter ózgerdi. Bul týraly búgin Astanadaǵy brıfıngte QR Tabıǵı monopolııalardy retteý agenttigi tóraǵasynyń orynbasary Asylbek Dúısebaev málim etti.
Atap aıtqanda, Petropavl qalasynyń turǵyndary úshin sýdyń baǵasy 1000 lıtr úshin 54 teńgeniń ornyna ortasha alǵanda endi 76 teńge, al kárizge 1000 lıtr úshin 42 teńgeniń ornyna 66 teńgeni quraıtyn bolady. Bul qyzmetti «QyzyljarSý» kásiporny kórsetedi. Belgili bolǵanyndaı tarıftiń shektik deńgeıi 2013-2016 jyldarǵa bekitilgen.
Budan bólek Almaty oblysynyń Qapshaǵaı qalasynda da sýdyń baǵasy ósti.Máselen, onda aıyna 1 adamǵa 2,7 tekshemetrden aspaıtyn tutyný kólemi 1000 lıtr úshin 37,31 teńgeni quraıdy (buryn 33,91 teńge boldy), sonymen qatar bir adamǵa aıyna 2,7 jáne 3,7 tekshemetr arasynda tutyný kólemi 1000 lıtr úshin 47,7 teńge boldy (buryn 42,59 teńge). Buǵan qosa 1 adamǵa aıyna 3,7 tekshemetrden asatyn tutyný kólemi jáne sýdy esepteý quraldary ornatylmaǵandarǵa 1000 lıtr úshin 66,64 teńgeni qurady (buryn 48,22 teńge boldy). Káriz qyzmetteriniń tarıfteri turǵyndar úshin 1000 lıtrge 66,69 teńgege jetti. Osynyń aldynda 42,45 teńge deńgeıinde bolǵan edi.
Munymen qosa Atyraý qalasynyń turǵyndaryna 1 jeltoqsannan bastap sýdyń baǵasy 1000 lıtr úshin 76,47 teńgeni qurady (buryn 43,56 teńge bolǵan), al kárizge 1000 lıtr úshin 36,16 teńgege jetti (buryn 27,10 teńge bolǵan).
«Shyǵys Qazaqstan oblysynyń 3 aýylynda jáne Qaraǵandy oblysynyń Keńgir aýylynda sý jáne káriz qyzmetteriniń baǵalary joǵarylady. Tarıftermen barlyq tutynýshylardy mindetti túrde tanystyrdyq»,-dep túıdi A. Dúısebaev.
