Respýblıkamyzda 70 tehnıkalyq baıqaý ortalyqtary jumys isteıdi
ASTANA. 20 aqpan. QazAqparat - Sońǵy málimetter boıynsha 52 030 avtokólik quraldary tehnıkalyq baıqaýdan ótti. Bul týraly QR Kólik jáne kommýnıkatsııa mınıstrligi qyzmetiniń negizgi baǵyttary boıynsha statıstıkalyq málimetterinde kórsetilgen.
Kóliktik baqylaý komıtetiniń habarlaýynsha, búgingi kúni respýblıkamyzda 70 tehnıkalyq baıqaý ortalyqtary (TBO) jumys isteıdi. Bul ortalyqtar 163 tehnıkalyq baıqaý jelisinen, ıaǵnı 70 mobıldi, 93 statsıonarlyq jeliden turady.
17 aqpandaǵy málimet boıynsha, 52 030 avtokólik quraldary tehnıkalyq baıqaýdan ótkizilgen.
Budan buryn habarlanǵandaı, bıylǵy 17 qańtarda Kólik jáne kommýnıkatsııa mınıstrliginde ótken baspasóz qyzmetinde aǵymdaǵy jylǵy birinshi toqsanda elimizde 214 tehnıkalyq qadaǵalaý jelisi bar 90 tehnıkalyq baıqaý ortalyqtary ashylatyny aıtylǵan edi.
Avtokólikterdegi qaýipsizdikti qamtamasyz etý maqsatynda olarǵa tehnıkalyq baıqaý júrgizý jeke ortalyqtardyń qaraýyna berildi. Atap aıtqanda, osy tehnıkalyq baıqaýdan ótkizýdiń jańa tártibi damyǵan elderdiń tájirıbesine negizdelip otyr. Tehnıkalyq baıqaýdan ótkizýdiń merzimi men avtokólikter parametrlerin tekserýdiń talaptary burynǵy qalpynda qalady.
Aıta keteıik, tehnıkalyq qadaǵalaýdyń qabyldanǵan jańa júıesi aıasynda tekserýden ótýge negizdelgen qujattar 8-den 3-ke deıin qysqardy. Sonymen qatar, 2012 jyldyń qańtarynan bastap kólikterdi tehnıkalyq baıqaýdan tirkelgen aýmaǵyna qaramastan kez kelgen ortalyqta ótkizýge bolady.
Munymen qosa, atalǵan ortalyqtardyń kórsetken qyzmet sapasyna jaýapkershilik deńgeıi bekitildi.
