Respýblıkamyzda 2454 ákim saılandy - OSK
ASTANA. 10 tamyz. QazAqparat - Respýblıkamyzda 2454 aýdandyq mańyzy bar qala, aýyldyq okrýg jáne kent ákimderi saılandy. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıng barysynda QR Ortalyq saılaý komıssııasynyń tóraǵasy Qýandyq Turǵanqulov málim etti.
Eske salsaq, QR Perzıdentiniń Jarlyǵyna sáıkes, aǵymdaǵy jyldyń 5-9 tamyz aralyǵynda elimizdiń 14 oblysynda aýdandyq mańyzy bar qalalar, aýyldyq okrýgteri, aýyldyq okrýgterdiń quramyna kirmeıtin kentter men aýyldardyń 2457 ákiminiń saılaýy ótti. «Barlyǵy 2454 ákim saılandy. Úsh aýyldyq okrýgte jeńimpazdar anyqtalǵan joq. Sebebi tańdaýshylardyń daýystary teń bólindi. Atalǵan ákimshilik aýmaqtyq qurylymda tamyzdyń 28-inde qaıta saılaý ótkiziledi», - dedi Q. Turǵanqulov.
Onyń aıtýynsha, saılaý naýqany barysynda barlyǵy 7173 ákimdikke kandıdat usynylyp, 6738-i tirkeldi. Daýys berý bıýlletenderine 6403 kandıdattyń tegi engizildi. Ortasha alǵanda bir ákim laýazymyna ekiden asa úmitker qatysqan. «Saılaýǵa jalpy respýblıka boıynsha tańdaýshylardyń (máslıhat depýtattarynyń) 98,3 paıyzy qatysty», - deıdi OSK tóraǵasy.
