Respýblıkalyq jyr músháırasynda batysqazaqstandyq qos stýdent top jardy
ORAL. QazAqparat - Taldyqorǵan qalasynda ótken «Іlııas álemi» atty dástúrli respýblıkalyq stýdent-jastar festıvali aıasynda ótken jyr músháırasynda batysqazaqstandyq qos stýdent top jardy, dep habarlaıdy «QazAqparat» tilshisi.
M.Ótemisov atyndaǵy Batys Qazaqstan memlekettik ýnıversıtetiniń aǵa oqytýshysy, magıstr Aıdarbek Aqbolatovtyń aıtýynsha, atalmysh festıvaldi І.Jansúgirov atyndaǵy Jetisý memlekettik ýnıversıteti Іlııas Jansúgirov, Sáken Seıfýllın, Beıimbet Maılın syndy Alash arystarynyń ómirden ótkenine 80 jyl tolýyna oraı uıymdastyrdy.
Festıval aıasynda «Soǵaıyn sózimnen bir sulý saraı» atty jyr músháırasy, sondaı-aq «Tar joldy, taıǵaq keshýli taǵdyrlar» (І.Jansúgirov, S.Seıfýllın, B.Maılın) atty ǵylymı joba baıqaýy jáne І.Jansúgirov, S.Seıfýllın, B.Maılın muralaryn zertteýge arnalǵan «Іlııas murasy jáne alashtaný máseleleri» atty jas ǵalymdar men stýdent jastarǵa arnalǵan respýblıkalyq ǵylymı-praktıkalyq konferentsııa ótkizildi.
Jyr báıgesinde M.Ótemisov atyndaǵy BQMÝ stýdenti, qazirgi kezde bir jyldyq grantpen Almatydaǵy Ál-Farabı atyndaǵy QazMUÝ-da bilim alyp júrgen Márlen Ǵılymhan bas júldeni jeńip aldy. Sondaı-aq M.Ótemisov atyndaǵy BQMÝ-dyń 4 kýrs stýdenti Madııar Tóleýov birinshi orynǵa ıe boldy.
Aıta keteıik, bulardyń ekeýi de - osyndaı jyr dodalarynda bas báıge alyp júrgen talantty jastar.
