Respýblıkalyq joldardyń jol qyzmetteri qysqa daıyn - QazAvtoJol

ASTANA. QazAqparat - «QazAvtoJol» ulttyq kompanııasynda 2018-2019 jyldyń kúzgi jáne qysqy maýsymyna respýblıkalyq mańyzy bar avtomobıl joldaryn daıyndaý máselesi qaraldy,  dep habarlaıdy QazAqparat tilshisi.

«QazAvtoJol» kompanııasy taratqan málimetke sáıkes, QR Investıtsııalar jáne damý mınıstrliginiń Avtomobıl joldary komıteti tóraǵasynyń orynbasary Saıranbek Barmaqovtyń tóraǵalyǵymen ótken keńeske «QazAvtoJol» UK» AQ, «Qazaqavtojol» JShS, «Obljolzerthana»  mekemesiniń oblystyq fılıaldarynyń jáne merdger uıymdardyń ókilderi qatysty.

«Qys mezgilinde 24 382 shaqyrym joldy kútip ustaý josparlanyp otyr. Jalpy uzaqtyǵy  2 372,3 shaqyrymdy quraıtyn 2 607 qar jınalyp qalatyn ýchaske anyqtalǵan. Avtomobıl joldaryn qardan der ýaqytynda tazalaý úshin atalǵan ýchaskelerge 1 074 tehnıka bekitilgen», - dep atap ótedi kompanııadan.

«Qazaqavtojol» JShS qysqy kezeńge 109 qazandyqty, 194 óndiristik bazany, 129 jylytý beketin, kóktaıǵaqqa qarsy qoldanylatyn materıaldar men hımııalyq reagentterdi saqtaýǵa arnalǵan 84 qoımany daıyndap qoıǵan.

Buǵan qosa, qazirgi ýaqytta 5 238 ýaqytsha jol belgisi, 39 370 qardy toqtatatyn qorǵan daıyndaldy. Aıta keterligi, atalǵan jabdyqtardyń 10 960-y qazirgi ýaqytta qar basý qaýpi bar ýchaskelerge ornatylǵan. Sý ótkizetin qubyrlardy jabý jumystary bastaldy. Osy ýaqytqa deıin 1 872 qubyr bekitildi.

Qysqy kezeńde  joldarǵa 1 308 tehnıka shyǵarylady. Tolyqtaı alǵanda, respýblıkalyq mańyzy bar avtomobıl joldaryn qysqy merzimdi paıdalanýǵa daıyndyq jumystary tolyqtaı aıaqtaldy.