Respýblıkalyq joldardyń 387 ýchaskesin sý basý qaýpi bar
«Sý tasqyny qaýpiniń ýaqtyly aldyn alý jáne joıý maqsatynda mınıstrlik avtomobıl jáne temir joldardy sý tasqyny kezeńine daıyndaý jumystaryn júrgizýde. Búgingi tańda respýblıkalyq joldardyń uzyndyǵy 25 myń shaqyrymdy quraıdy. Onda 1 216 kópir jáne 15 403 sý ótkizý qubyry bar. Osy joldarda 387 qaýipti ýchaske, 74 kópir jáne 818 sý ótkizgish qubyrlar anyqtaldy. Osy nysyndarǵa 500-ge jýyq jol paıdalaný tehnıkalary bekitildi», - dedi mınıstr.
Onyń atap ótýinshe, daıyndyq jumystary aıasynda sý tasqynyna qarsy is-sharalar jospary bekitilip, ortalyq jáne óńirlik deńgeılerde komıssııalar quryldy.
«Táýlik boıy kezekshilik uıymdastyrylyp, avtojoldar men jol qurylystary tekserilip jatyr. Sý tasqyny kezeńinde jumystardy ýaqtyly uıymdastyrý úshin ınertti jáne basqa materıaldardy daıyndaý bastaldy. Qazirgi ýaqytta materıaldardyń daıyndyǵy 50 paıyzdy quraıdy. Atap aıtqanda, 13 myń tekshe metr qum daıyndaldy, bul josparly qajettiliktiń – 66 paıyz, 3 myń tekshe metr tas – 52 paıyz, 11 myń tekshe metr qıyrshyq tas – 42 paıyz, 244 myń lıtr janar-jaǵar maı – 38 paıyz. Osy jyldyń 15 aqpanyna deıin qajetti materıaldardy daıyndaý 100%-ǵa deıin jetkiziledi», - dedi ol.
Mınıstrdiń dereginshe, aýa raıy jaǵdaıyna baılanysty aqpan aıynan bastap 5 742 sý ótkizgish qubyrlardy qardan tazartý jumystary josparlanǵan. Sý tasqynyna qarsy is-sharalardy qarjylandyrý avtojoldardy kútip-ustaýǵa bólingen qarajat sheńberinde qamtamasyz etiledi. Sondaı-aq jumystardy oryndaý kezinde óńirlerdiń aýa-raıy men klımattyq jaǵdaılary jáne ótken jyldardaǵy sý tasqyny kezeńiniń nátıjeleri eskeriledi.
«Jańǵyrtý aıasynda sońǵy jyldardaǵy jaýyn-shashyn men sý tasqyny normasyna súıene otyryp, jasandy qurylystardy salý, úıindiniń bıiktigin arttyrý, sý tasqyny qaýpi bar ýchaskelerdegi eńisterdi nyǵaıtý boıynsha jumystar júrgizilýde. Sý qubyrlarynyń ótkizý qabiletin arttyrý úshin, tıisti jóndeýler sheńberinde qubyrlar sanyn arttyryp, dıametrin úlkeıtip eski qubyrlardy aýystyrý júrgiziledi. Jalpy, avtojoldardy qaıta jańartý esebinen sý tasqyny qaýpi bar ýchaskeler sany jyl saıyn qysqartyldy», - dedi Marat Qarabaev.