Respýblıkalyq joldarda salynatyn servıstik nysandardyń tıptik jobasy bekitildi

NUR-SULTAN. QazAqparat – QazAvtoJol kompanııasy respýblıkalyq mańyzy bar avtojoldardyń boıynda ornalasatyn servıstik nysandardyń tıptik jobasyn bekitti, dep habarlaıdy QazAqparat tilshisi.

«QazAvtoJol kompanııasy jol boıyndaǵy servıs nysanyn salýdyń tıptik jobasyn, naqtyraq aıtqanda osy jobanyń «A» sanatyn bekitti. Bul jobamen QazAvtoJol saıtynan tanysa alasyz. «A» sanatynan bólek «B», «C», «D» sanatyndaǵy nysandardyń jobasy bar», - dedi Rústem Isaev «QazAvtoJol» komnanııasynyń Instagram-paraqshasynda tikeleı efırde sóılegen sózinde.

Rústem Isaev jol boıyndaǵy nysandardyń bulaı bólinýiniń mánin túsindirdi.

«Jol boıyndaǵy servıs nysandary tórt sanatqa bólinedi. «A» sanatyna jatatyndar – eń aýqymdy ári kópfýnktsıonaldy keshen. Ol sanattaǵy keshende janar-jaǵarmaı beketi, dámhana, bólshektik saýda pýnkti, aqyly turaq pen oıyn-saýyq ortalyǵy bolady.

«B» sanatyna jatatyn servıster – odan sál kishirek, alaıda ol da kópfýnktsıonaldy keshen.

«C» sanaty degenimiz – dámhanasy bar.

Al «D» sanaty barlar – janar-jaǵarmaı beketi bar servıs», - dedi ol.