Respýblıkalyq jelide normatıvtik jaǵdaıǵa sáıkes keletin joldardyń úlesi 90 paıyz boldy

ASTANA. QazAqparat – Bıyl 11 myń shaqyrymnan astam avtojolda qurylys-montajdaý jumystary júrgizilip jatyr. Bul týraly Májilistegi Úkimet saǵatynda Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

Onyń aıtýynsha, respýblıkalyq jeli boıynsha normatıvtik jaǵdaıǵa sáıkes keletin joldardyń úlesi – 90 paıyz, jergilikti jelide bul kórsetkish 80 paıyz shamasynda.

«Bıyl jalpyǵa ortaq paıdalanylatyn 11 myń shaqyrymnan astam avtojolda qurylys-montajdaý jumystary júrgizilip jatyr. Sonyń ishinde respýblıkalyq jeli boıynsha 4 myń shaqyrym jolda qurylys jáne qaıta jańartý jumystary qamtylǵan. Shamamen 3 myń shaqyrym jolda kúrdeli jáne ortasha jóndeý iske asyrylyp otyr», - dedi Q. Óskenbaev.

Mınıstrdiń sózine qaraǵanda, jergilikti jeli boıynsha jóndeýdiń barlyq túrlerimen 4,6 myń shaqyrym avtojol qamtylǵan. Respýblıkalyq bıýdjetten avtojol salasyn damytýǵa 2022 jylǵa 603 mlrd teńge bólindi.

Aıta keteıik, 2025 jyly respýblıkalyq jeli boıynsha normatıvtik jaǵdaıdaǵy joldardyń úlesi 100 paıyzǵa deıin jetkizilmek.