Respýblıkalyq jedel-qutqarý jasaǵyna «Barys» ataýy berilmek

ASTANA. QazAqparat – Ashyq NQA portalynda «QR Tótenshe jaǵdaılar mınıstrliginiń keıbir máseleleri týraly» Úkimet qaýlysynyń jobasy jarııalandy, dep habarlaıdy QazAqparat tilshisi.

«QR jedel-qutqarý jasaǵy» memlekettik mekemesiniń ataýy «Barys» respýblıkalyq jedel-qutqarý jasaǵy» memlekettik mekemesi bolyp ózgertilsin. Tótenshe jaǵdaılar mınıstrliginiń qaramaǵyndaǵy memlekettik mekemeler osy qaýlyǵa qosymshaǵa sáıkes qaıta uıymdastyrylsyn», - delingen Úkimet qaýlysynyń jobasynda.

Sonymen qatar, óńirlerdegi Jedel-qutqarý jasaqtary Órt sóndirý jáne avarııalyq-qutqarý jumystary qyzmetiniń quramynan shyǵarylady. Endi olar árbir oblys pen Astana, Shymkent qalalaryndaǵy aýmaqtyq Tótenshe jaǵdaılar departamentterine baǵynysty vedomstvo bolady.

«Jobada Memleket basshysynyń Túrkııa Respýblıkasyna sapary barysynda aıtylǵan túrki memleketteriniń tótenshe jaǵdaılar jónindegi organdarynyń birlesken kúshterin qurý jónindegi jáne Qazaqstan Respýblıkasy Premer-Mınıstriniń birinshi orynbasary Roman Sklıardyń tapsyrmalaryn iske asyrý sheńberinde Jedel-qutqarý jasaqtaryn Órt sóndirý jáne avarııalyq-qutqarý jumystary qyzmetteriniń quramynan shyǵarý jáne árbir oblys ortalyǵynda jáne Astana, Shymkent qalalarynda aýmaqtyq Tótenshe jaǵdaılar departamentterine vedomstvolyq baǵynysty 19 derbes memlekettik mekemeler túrinde usynylady. Bir ýaqytta Qazaqstannyń álemdik arenadaǵy ımıdjin arttyrý úshin jáne Respýblıkalyq jedel-qutqarý jasaǵy (Almaty q.) ornalasqan jerin eskere otyryp, ony «Barys» respýblıkalyq jedel-qutqarý jasaǵy dep qaıta ataý usynylady», - dep túsindirme berilgen qaýlyǵa.

Qujat 15 maýsymǵa deıin kópshilik talqylaýda bolady.