Respýblıkalyq jedel-qutqarý jasaǵy joǵalǵan týrısterdi Qumbelsý shatqalynan tapty
ASTANA. QazAqparat - Almatyda 2 qarasha kúni úsh týrıst eki kún buryn «Molodejnyı» shyńyna shyǵyp, belgilengen ýaqytta úılerine qaıtpaı qalǵany habarlandy. 2 qarashada saǵat 09 saǵat 55 mınýtta Respýblıkalyq jedel-qutqarý jasaǵynyń kezekshi-dıspetcherlik qyzmetine joǵalǵan azamattyń jubaıynan qońyraý kelip tústi. Aqparatty alǵan sátten bastap, jasaqtyń 1 tehnıkasy jáne 6 qutqarýshydan turatyn jedel toby Kishi Almaty shatqalyna qaraı bet aldy, dep habarlaıdy QR ІІD TJK baspasóz qyzmetinen.
Qutqarýshylar toby joldyń nashar jáne tehnıkanyń ótýi qıyn bolǵandyqtan tehnıkany jáne 1 qutqarýshyny RJQJ-nyń jedel kezekshiligimen baılanysqa shyǵý úshin qaldyryp, ary qaraı jaıaý barýlaryna týra keldi. Joǵaryǵa shyǵý kezinde «T-1» aýdanynda qutqarýshylar joldan kezdesken týrısterden surastyryp jáne sol aımaqta ornalasqan ǵımarattardy izdestirdi. «Kazseldenqorǵaý» stantsııasy Myńjylqy shatqaly aýdanynda joǵalǵan týrıster týraly aqparat rastalmady. Sonymen qatar «T-1» aýdany jiti tekserilip, osy aýmaqtan joǵalǵan adamdardyń ornalasqan izderi tabylmady.
Keshke qaraı RJQJ-nyń kezekshi bólimine ótinish berýshi áıelden týrısterdiń baılanysqa shyqqandyǵy týraly qońyraý kelip tústi. Aýa temperatýrasynyń tómendeýinen, qoıý týman saldarynan, kórý qashyqtyǵy 10 metrden aspaı jáne ózderiniń taýǵa shyqqan joldarynan adasyp ketken. Kelip túsken aqparatqa sáıkes, olardyń Qumbelsý shatqalynda ekendigi anyqtaldy. Ýaqytty únemdeý maqsatynda 6 qutqarýshydan turatyn ekinshi jedel topty jáne bir tehnıkany izdestirý ornyna jiberildi. Qutqarýshylar toby az ýaqyt ishinde aýdanda ornalasqan «Alpııskaıa roza» demalý ortalyǵyna izdestirýge kiristi. Taýǵa shyǵý jáne izdestirý jumystary aýa raıynyń qolaısyzdyǵymen jáne kúnniń qaraıýyna baılanysty qıyndaı tústi. Joǵalǵan azamattar tún jarymynda tabyldy. Azamattar qatty sharshaǵan jáne tońyp qalǵan. RJQJ jedel qutqarý toby ýaqytty sozbaı kómek kórsetti. Azamattar medıtsınalyq kómekten bas tartty. Tańǵy 6-larda zardap shekkender qalaǵa jetkizildi. Qutqarý operatsııasy 20 saǵattaı ýaqytty aldy. Jeke quramnan 12 adam jáne 2 tehnıka jumyldyryldy. RJQJ qyzmetkerleri 3 adamdy qutqardy.
