Respýblıkalyq jarysta júldeli bolǵan túrkistandyq oqýshylar marapattaldy
TÚRKІSTAN. QazAqparat – Túrkistan oblysynyń «Barys» áskerı patrıottyq klýbynyń oqýshylary respýblıkalyq VI Aıbyn áskerı patrıottyq jıynyna qatysyp, júldeli ekinshi oryndy ıelengen bolatyn. Óńiriń atynan áskerı patrıottyq jıynda jetistikke jetken oqýshylar arnaıy alǵys hatpen marapattalyp, olarǵa baǵaly syı-sııapat berildi, dep habarlaıdy QazAqparat tilshisi.
Saltanatty jıynǵa oblystyq adamı áleýetti damytý basqarmasynyń ókili Qaırat Arap qatysyp, jeńimpazdardy quttyqtap ótti.
«Respýblıkalyq «Aıbyn-2020» jastar jıynyna qatysqan Arys qalasynyń «Barys» áskerı-patrıottyq klýby úlken jetistikterge qol jetkizgenin erekshe aıtty.
Máselen, «Smart Sarbaz-2020» robot tehnıkasy saıysynda Ábdibek Qýanysh fýnktsıonaly adam qolynyń múmkindikterin kóshiretin robottandyrylǵan aıaq-qoldy tanystyrdy.
Qashyqtan basqarýǵa bolatyn robot gıdravlıkalyq jetekshi jáne gıdrostatıkalyq berilý múmkindigin paıdalanady. Qazir 9 kelige deıingi salmaqty kótere alatyn qurylǵy, jetildirilse 50 kelige deıin kóterýge múmkindik paıda bolady.
Joba tolyq aıaqtalsa, onyń kómegimen oq-dári, mına tazartý, snarıadtardy nemese basqa da aýyr zattardy tıeý nemese túsirý sııaqty kúrdeli jumystardy oryndaı alatyn qabiletke ıe bolady.
Saıys nátıjesinde, tóreshiler ázirleme avtorynyń eńbegin joǵary baǵalap, Ábdibek Qýanysh І oryndy jeńip aldy.
Endi «Barys» áskerı patrıottyq klýbyn alda áskerı-qoldanbaly sport túrleri boıynsha jarystar, alǵashqy medıtsınalyq kómek kórsetý boıynsha konkýrs jáne «Breın-rıng» fınaldyq oıyny kútip tur.
Aıta keteıik, eki aıǵa sozylǵan «Aıbyn» áskerı-patrıottyq Respýblıkalyq jastar jıynyna onlaın-formatta 15 adamnan turatyn 39 komanda qatysty.
Olar áskerı qoldanbaly sport túrleri, ıntellektýaldyq jáne shyǵarmashylyq jumystar boıynsha ózara saıysqa túsken bolatyn.
Jarystyń jeńimpazdary áleýmettik jelilerdiń kómegimen daýys berý arqyly anyqtalǵan.
«Barys» áskerı patrıottyq klýby on kúnniń ishinde 8,5 mln qaralym, 98 myń lúpil, 72 myń qoldaý pikirge ıe bolǵan edi.
