Respýblıkalyq «Voleıbol festıvali» merekesi ótedi
ALMATY. 31 mamyr. QazAqparat /Erlik Erjanuly/ - 4 maýsym kúni Almaty men Astana qalalarynda, barlyq oblys jáne aýdan ortalyqtarynda respýblıkalyq «Voleıbol festıvali» bolady.
Halyqaralyq voleıbol federatsııasynyń qamqorlyǵymen dástúrli túrde álemniń kóptegen elderinde ótetin bul sharaǵa 2009-2010 jyldary 1 mıllıonnan astam adam qatysqan bolatyn. Maqsat - balalar men jasóspirimder sportyn damytý, deneshynyqtyrý men salaýatty ómir saltyn nasıhattaý jáne jurtshylyq arasynda voleıboldy taratý. Qazaqstan oǵan bıyl tuńǵysh ret qatysqaly otyr. Ony «Samuryq-Qazyna» ulttyq ál-aýqat qorynyń qoldaýymen Týrızm jáne sport mınıstrligi jáne QR Ulttyq voleıbol federatsııasy birigip uıymdastyrady.
Almaty qalasynda bul shara Oktıabr Jarylǵapov atyndaǵy sport kesheninde ótpek. Onda mektep jasyndaǵy balalar úshin 10 alań daıyndalyp otyr. Saıabaqtyq voleıbol boıynsha bolatyn bul saıysta ár komandada 4 oıynshy óner kórsetpek. Jeńimpazdar men júldegerler jarys sońynda eskertkish syılyqtarmen marapattalady dep josparlanýda.
