Respýblıkalyq Transfýzıologııa ortalyǵynda donorlyq kómekke shaqyrǵan aktsııa ótti
ASTANA. 6 sáýir. QazAqparat/Aınur Kenebaeva/ - 7 sáýir - Dúnıejúzilik densaýlyq kúni qarsańynda Respýblıkalyq ǵylymı-óndiristik Transfýzıologııa ortalyǵynda «Donorlyq kómek - salaýatty urpaq» atty aktsııa ótkizildi.
Atalmysh aktsııanyń negizgi maqsaty - donorlyq kómek kórsetý isine Qazaqstan jurtshylyǵyn jumyldyrý.
Donorlardy irikteý bóliminiń basshysy Svetlana Skorıkovanyń málimdeýinshe, 2010 jyly 40 myńǵa tarta adam donor bolý jóninde nıet bildirgen, sonyń ishinde 36800 adamnan qan alynǵan. Donorlardyń 80% -ǵa jýyǵy eshqandaı ótemaqysyz óz betimen qan tapsyrǵandar. «Astana qalasy boıynsha donorlyq qan tapsyrýdyń joǵary kórsetkishteri tirkelgen: 1000 adamǵa shaqqanda 53, ıaǵnı bul eýropalyq talaptarǵa saı kórsetkish bolyp esepteledi, degenmen Qazaqstan boıynsha ortasha kórsetkish aıtarlyqtaı joǵary emes», - dedi Svetlana Skorıkova jýrnalısterge bergen suhbatynda.
Svetlana Skorıkovanyń sózine sáıkes, Astana qalasynyń qan ortalyǵy medıtsınalyq mekemelerdi qajetti qanmen tolyqtaı qamtamasyz ete alady. Onda qazirgi tańda eki brıgada jumys isteıdi.
Byltyrǵy jyldyń statıstıkalyq málimetterine sáıkes ortalyqta tirkelgen donorlardyń 40% - y - jıi qan tapsyratyn tulǵalar. Dáriger jınaqtalǵan qan qoryn ýaqyt óte kele jańartyp turý qajettigin aıtady. Qazirgi tańda ortalyqqa jıi qan ótkizetindermen qatar jańa donorlar da kóptep keledi eken. Olar - 18-26 jas shamasyndaǵy jastar.
Qazirgi tańda qan tapsyrý barysynda barlyq qaýipsizdik sharalary qatań túrde saqtalady. Donor men retsıpıenttiń eki jaqty qaýipsizdigin qamtamasyz etý maqsatynda dárigerler birneshe tekseris kezeńderin júzege asyrady. Birinshiden, anketalyq saýalnama júrgizý, ekinshiden vırýstyq, ınfektsııalyq aýrýlar tizimi boıynsha tekseris jasaý jáne sońǵy kezeń - qandy saraptamaǵa jiberý.
Svetlana Skorıkovanyń pikirinshe, donorlyq kómek adam ómirin saqtap qalýdyń bir joly ǵana emes, sonymen qatar ol - qoǵam músheleri arasynda gýmanıstik kózqaras pen jaýapkershilik týdyrýǵa túrtki bolatyn jaqsy bastama.
Sharaǵa rýspýblıkalyq jáne qalalyq qoǵamdyq qorlar ókilderi, dárigerler, donorlar men retsıpıentter qatysty.
