Respýblıkalyq telearnalarda azamattardyń quqyqtyq mádenıetin arttyrýǵa negizdelgen baǵdarlamalar paıda bolady - B. Beknazarov
ASTANA. 18 qańtar. QazAqparat /Rýslan Ǵabbasov/ - Bıyl respýblıkalyq telearnalarda azamattardyń quqyqtyq mádenıetin arttyrýǵa negizdelgen baǵdarlamalar paıda bolady. Bul týraly búgin Senattyń jalpy otyrysynan keıin Joǵarǵy Sot Tóraǵasy Bektas Beknazarov málim etti.
Onyń sózine qaraǵanda, búginde reseılik birqatar telearnalarda sot protsesteri boıynsha jaqsy baǵdarlamalar júrip jatyr. Bul baǵdarlamalarda óz kezeginde jábirlenýshi men aıyptalýshylardyń quqy jaıynda tolyq túsinik beriledi.
Osyndaı baǵdarlamalar qazirgi kezde Qazaqstanda da ázirlenip otyrǵandyǵyna jáne qarjylandyrý sharalaryn sheshý jumystary júrip jatqandyǵyna toqtalǵan B. Beknazarov, «bıyldan bastap elimizde osy tektes baǵdarlamalar paıda bolady. Adamdarǵa quqyqtyq bilim beretin protsesterdi shyn máninde kóretin bolasyzdar», - dedi.
Tóraǵanyń aıtýynsha, atalǵan baǵdarlamalarǵa tájirıbe júzinde jumys istep júrgen sýdıalar qatyspaq. Qazirgi kezde osy másele boıynsha kelissózder «Habar», «Qazaqstan», «Astana» telearnalarynda júrip jatqan kórinedi.
