Respýblıkalyq «Táýelsizdik tolǵaýy» konkýrsy ótedi

ASTANA. 9 aqpan. QazAqparat - Qazaqstan Respýblıkasynyń Mádenıet jáne aqparat mınıstrligi ІV respýblıkalyq «Táýelsizdik tolǵaýy» konkýrsyn ótkizedi. Konkýrs eńbekke, adal kásibı tabysqa, Otanǵa qyzmet etýge, joǵary patrıottyq nıetterge oń kózqarastar qalyptastyratyn mádenı ónimderdi jasaý jáne Táýelsizdiktiń tarıhı mańyzdylyǵy men jańa Qazaqstannyń qalyptasýyn aıshyqtaıtyn jańa týyndylardy shyǵarýdy yntalandyrýǵa baǵyttalyp otyr.

Atalǵan konkýrs birqatar atalymdar boıynsha ótkiziledi. Atap aıtqanda, birinshi - eń úzdik iri jáne shaǵyn kólemdi mýzykalyq shyǵarma. Oǵan kópaktili opera, kópaktili balet, kópaktili mýzykalyq komedııa, sımfonııalyq, halyq aspaptary, úrmeli jáne kameralyq orkestrler úshin orkestrlik shyǵarmalar, jeke ánshi, hor jáne orkestr úshin oratorııa, jeke ánshi, hor jáne orkestr úshin kantata, fortepıano men daýysqa arnalǵan vokaldyq tsıkldar, romanstar, súıemeldeýsiz horǵa arnalǵan shyǵarmalar, shekti aspaptar kvartetine, úrmeli-aǵash aspaptary kvıntetine arnalǵan shyǵarmalary kiredi.

Ekinshi atalym - eń úzdik balalar áni. Úshinshi - balalar men jasóspirimderge arnalǵan eń úzdik dramalyq shyǵarma. Tórtinshi atalym -keskindeme, grafıka jáne músin.

Konkýrsqa belgilengen atalymdar sheńberinde jeke avtorlardyń nemese avtorlyq ujymdardyń shyǵarmalary qabyldanady. Usynylatyn shyǵarmalar buryn-sońdy oryndalmaǵan jáne jarııalanbaǵan jańa shyǵarma bolýy kerek.

Avtorlar bir nemese birneshe atalymǵa qatysa alady. Ár atalym boıynsha avtor tek bir shyǵarma ǵana usyna alady. Konkýrstyń qorytyndysy aǵymdaǵy jyldyń IV toqsanynda shyǵarylady. Eń úzdik dep tanylǵan shyǵarmalarǵa aqshalaı syılyqtar taǵaıyndalady dep kútilýde. Al konkýrsqa qujattar aǵymdaǵy jyldyń 15 qazanyna deıingi merzimde jiberilýi tıis. Konkýrsqa qatysý úshin qajetti qujattardyń qatarynda Qazaqstan Respýblıkasy Ádilet mınıstrliginiń Zııatkerlik menshik quqyǵy komıtetimen berilgen zııatkerlik menshik obektisin memlekettik tirkeý týraly kýáliktiń bolýy shart.