Respýblıkalyq tank bıatlonynda QR úzdik tank ekıpajdary anyqtaldy (FOTO)

ASTANA. QazAqparat - Aıagóz garnızonynyń «Maılıno» oqý ortalyǵynda QR QM Qurlyq áskerleri tank ekıpajdary arasynda «Tank bıatlony» boıynsha irikteý jarysy ótti, dep habarlady QR Qorǵanys mınıstrliginiń baspasóz qyzmeti.

Oǵan «Ońtústik», Shyǵys», «Batys» óńirlik qolbasshylyqtarynan jáne Aeroutqyr áskerleriniń tank ekıpajdary qatysyp, sheberlikterin kórsetti.

Áskerı qyzmetshiler aldynda Qorǵanys mınıstriniń birinshi orynbasary - QR QK Bas shtabynyń bastyǵy, general-polkovnık S.Jasuzaqov atalǵan sharanyń mańyzdylyǵyna toqtalyp, onyń jeke quramnyń jaýyngerlik ázirligin tekserýge jáne shilde-tamyz aılarynda Resseıde ótetin halyqaralyq jarysqa qatysatyn eń úzdik ekıpajdy irikteýge múmkindik jasaıtyndyǵyn aıtyp, jarysqa qatysýshylarǵa aq jol tiledi.

Ekıpajdar jeke jarysta T-72 tankisimen 12 shaqyrymdyq kúrdeli marshrýtty júrip ótti. Jol boıyna qoıylǵan bógetter, ótkelder, tankilerge qarsy qoıylǵan orlar men shuqyrlar, qorǵandar, jarylǵysh zattar sııaqty kedergiler naǵyz kásibı jaýyngerli anyqtaıtyn synaq boldy.

Jarys qorytyndysy boıynsha «Batys» jáne «Shyǵys» óńirlik qolbasshylyqtarynyń tank ekıpajdary úzdik ekıpajdar bolyp tanyldy. Olar RF Máskeý oblysyndaǵy halyqaralyq jarysqa baratyn bolady. «Alabıno» oqý ortalyǵyna TMD elderiniń, AQSh, GFR, Izraıl, Qytaı, Belgııa tank ekıpajdary kelmek.

Tank bıatlony - tank ekıpajdary arasynda ótetin áskerı-dalalyq jarystyń jańa túri bolyp sanalady. Ol alǵash ret ótken jyly tamyz aıynda Reseı Federatsııasynda ótti. Jerlesterimiz bul synaqta qurmetti ekinshi oryndy ıemdenip qaıtqan bolatyn.