Respýblıkalyq protez-ortopedııa ortalyǵyna júginetinderdiń 60% - balalar men jasóspirimder
ALMATY. QazAqparat – Qazaqstanda múgedektikke kóbine balalar men jasóspirimder ushyraıdy. Bul týraly Respýblıkalyq protez-ortopedııa ortalyǵynyń prezıdenti Nıkolaı Petrov málim etti, dep habarlaıdy QazAqparat tilshisi.
Nıkolaı Petrovtyń málimetinshe, mekemeniń statsıonarlarynda 225 oryn bar. Jalpy ortalyqqa 50 497 múgedek tirkelgen, onyń basym bóligi balalar men jasóspirimder.
«Bizge kóbine jastar men balalar keledi. Qazir adamdardyń basym bóligi qan tamyrlary syrqattarymen aýyrady. Qant dıabetine shaldyqqandar da az emes. Bizde jasalǵan protezderdiń 90% - balalarǵa arnalǵan aıaq kıim. Osyǵan qarap júregim aýrady. Bizde jasqa shekteý joq, 7 aılyq balalar da bar. Naýqastardyń dıagnozy ártúrli. Ótken jyly ortalyqtyń qyzmetine júgingen adamdardyń 60% 18 jasqa deıingi balalar men jasósipirimder boldy», - deıdi ol.
Sonymen qatar, N.Petrov ortalyqtyń shaǵyn sheberhanadan zamanaýı kásiporynǵa aınalǵanyn aıtty.
«Mekeme 1929 jyly Máskeýdegi Semashko atyndaǵy Memlekettik ortalyq protez zaýytynyń quramyna kiretin Almaty protez sheberhanasy retinde quryldy. Jylyna 30 myńnan astam ortopedııa buıymyn shyǵaramyz. Onyń 60-tan astamy aıaq-qol proteziniń modıfıkatsııasy, 112-si ortopedııalyq aıaq kıimniń barlyq maýsymyna arnalǵan modıfıkatsııasy jáne taǵy basqalary. Bizdiń mekeme Qazaqstanda óndiriletin protezdeý buıymdarynyń jalpy kóleminiń 74% jýyǵyn jáne mamandandyrylǵan ortopedııalyq aıaq kıimniń, ortopedııalyq ultaraqtyń 91% shyǵarady», - dedi ortalyq prezıdenti.
Respýblıkalyq protez-ortopedııa ortalyǵy múgedektigi jáne tirek-qımyl júıesinde kemistigi bar tulǵalarǵa medıtsınalyq-ońaltý kómegin kórsetedi. Qazir elimizdiń 7 qalasynda ortalyqtyń fılıaldary jumys isteıdi.
