Respýblıkalyq neırohırýrgııa ǵylymı ortalyǵynda tamyr neırohırýgııasy syrqaty boıynsha 300-inshi naýqasqa ota jasaldy

Bul týraly «Ulttyq medıtsınalyq holdıngi» AQ-nyń baspasóz qyzmetinen habarlady.

Jýyrda tamyr neırohırýrgııasy bólimshesiniń mamandary arterıovenozdy malformatsııa - bas mıy tamyr júıesiniń damýynyń týa bitken patalogııasy dıagnozymen 300-inshi naýqasqa operatsııa jasady. Osyndaı alǵashqy ota Ortalyqta úsh jyl buryn jasaldy.

Tamyr jáne fýnktsıonaldy neırohırýrgııa bólimshesiniń meńgerýshisi Erbol Mahambetovtyń aıtýynsha, jyl saıyn bólimshede 300-ge jýyq naýqas emdeýden ótedi. Olarǵa mıkrohırýgııalyq jáne endovaskýlıarlyq operatsııalar jasalady.

«Tek ótken jyldyń ózinde bólimshemizde bas mıy tamyrlarynyń zaqymdanýy dıagnozymen 135 endovaskýlıarlyq ota jasaldy. Tamyr patalogııalarynan bólek biz, sondaı-aq mıkrovaskýlıarlyq dekompressııa ádisimen trıgımınaldy nevralgııany emdeımiz, mıkrohırýrgııalyq operatsııalardyń kómegimen arterıaldy anevrızmanyń tilinýin, arterıovenozdy malformatsııanyń tilinýin emdep, isikterdi alamyz. Al bıyl radıojıilikti termodestrýktsııa ádisin qoldana bastadyq», - dep atap ótti ol.

Onymen birge, Ortalyqta aldaǵy ýaqytta ortalyq nerv júıesiniń túrli fýnktsıonaldyq buzylýlaryn emdeý kózdelip otyr. Respýblıkalyq neırohırýrgııa ǵylymı ortalyǵynyń aldaǵy josparynda sondaı-aq, epılepsııany hırýrgııalyq emdeý tásilderin engizý bar.

Eske salaıyq, Ulttyq medıtsınalyq holdıngtiń quramyna kiretin Respýblıkalyq neırohırýrgııa ǵylymı ortalyǵy joǵary tehnologııalyq neırohırýrgııalyq kómek kórsetý boıynsha Qazaqstan Respýblıkasyndaǵy jetekshi ǵylymı, ádistemelik jáne úılestirýshi ortalyq bolyp tabylady. Munda ortalyq jáne perıferııalyq nerv júıesi syrqattaryna shaldyqqan naýqastarǵa em-domnyń tolyq túri kórsetiledi.