Respýblıkalyq menshik boıynsha jekeshelendirýge 29 uıym jáne 3 nysan ótedi – E. Dosaev
ASTANA. QazAqparat - Respýblıkalyq menshiktegi 114 uıym qysqarady. Bul týraly búgin Ortalyq kommýnıkatsııalar qyzmetindegi brıfıngte QR Ekonomıka jáne bıýdjettik josparlaý mınıstri Erbolat Dosaev málim etti.
«Úkimetpen naqty júzege asyrylatyn ýaqyty belgilengen, básekeles ortaǵa berilýge jatatyn kvazımemlekettik sektor uıymdaryn aıqyndaý jumystary ótkizildi. Respýblıkalyq menshik boıynsha jekeshelendirýge 29 uıym jáne 3 nysan (sporttyq-saýyqtyrý «Nııaz-Batyr» ortalyǵy, demalys aımaǵy «Chaıka», demalys aımaǵy «Alataý» «Alakól» RMK) aıqyndaldy. 11 uıymdy senimgerlik basqarýǵa jeke bızneske beriledi, al 74-ti qaıta qurýǵa jáne jabýǵa usynylýda», - dedi mınıstr.
Sonymen qatar jekeshelendirýge kommertsııalyq saladaǵy oqý jáne ǵylym uıymdary, sanatorııler, buqaralyq aqparattyq quraldary, kúzet uıymdary («Kúzet» RMK) usynylǵan. «Nátıjesinde, respýblıkalyq menshiktik uıymdar sany 28 paıyzǵa nemese 114 uıymǵa qysqaryp, 277 uıymdy quraıdy»,-dedi E. Dosaev Esterińizge sala keteıik, Memleket basshysy byltyrǵy jyldyń 11 qazanynda keńeıtilgen úkimet májilisinde úkimetke jekeshelendirýdiń ekinshi tolqynynda kásiporyndar sanyn ulǵaıtýdy qamtamasyz etýdi tapsyrdy.
