Respýblıkalyq mańyzy bar jol boıynda 400-den astam sanıtarlyq torap ornatylady
«Infraqurylymdy damytýǵa baǵyttalǵan «Nurly jol» memlekettik baǵdarlamasynyń aıasynda 2025 jyldyń sońyna deıin respýblıkalyq mańyzy bar avtomobıl joldarynyń boıynda sanıtarlyq-gıgıenalyq toraptardyń 297 birligin ornatý kózdelgen. Budan bólek, jeke ınvestıtsııalardyń esebinen sanıtarlyq-gıgıenalyq toraby bar 128 janarmaı quıý beketi turǵyzylady dep kútilýde», - delingen QR Indýstrııa jáne ınfraqurylymdyq damý mınıstrliginiń Telegram kanalynda jarııalanǵan aqparatta.
Vedomstvo málimetinshe, bıyl qaıta jańartý jumystarynyń aıasynda «Shortańdy-Zerendi», «Qaraǵandy qalasynyń aınalma joly», «Nur-Sultan-Pavlodar», «Jetibaı-Jańaózen», «Nur-Sultan qalasynyń aınalma joly», «Uzynaǵash-Otar», «Óskemen-Rahman qaınary» men «Petropavl-Qorǵan» avtojoldarynda 22 sanıtarlyq torap qoıylady. 2021 jyly sanıtarlyq-gıgıenalyq toraptyń 40, 2022 jyly – 50, 2023 jyly – 55, 2024 jyly – 65 jáne 2025 jyly - 87 birligi ornatylady dep josparlanýda.
Sonymen qatar, 2025 jyldyń sońyna deıin halyqaralyq jáne respýblıkalyq mańyzy bar joldardyń boıynda jeke ınvestıtsııalardyń esebinen sanıtarlyq-gıgıenalyq toraby bar Compass, QazMunaıGaz, Helios, Sinooil jáne Kaztransgas sııaqty kompanııalardyń 128 janarmaı quıý beketi qoıylady.
Búgingi tańda «Almaty-Qorǵas», «Almaty-Tashkent», «Samara-Shymkent», «Aqtóbe-Martyq», «Nur-Sultan-Temirtaý», «Almaty-Óskemen», «Ekaterınbýrg-Almaty» men «Dossor-Aqtaý teńiz porty» avtomobıl joldarynda 18 janarmaı quıý beketiniń qurylysy júrgizilip jatyr.
«Jol boıyndaǵy servısti damytý máselesi QR Indýstrııa jáne ınfraqurylymdyq damý mınıstrligi Avtomobıl joldary komıtetiniń basty nazarynda», - dedi mınıstrlikten.
Eske salaıyq, «QazAvtoJol» UK» AQ avtojoldardyń aqyly ýchaskelerinde jeke ınvestıtsııalar esebinen sanıtarlyq-gıgıenalyq toraptary bar modýldik pavılondardy ornatý boıynsha konkýrs jarııalaǵan bolatyn.
