Respýblıkalyq mańyzy bar birqatar avtojoldarǵa shekteýler qoıyldy
ASTANA. 24 jeltoqsan. QazAqparat - Aýa raıynyń qolaısyz jaǵdaıyna baılanysty respýblıkalyq mańyzy bar birqatar avtojolda kólik qozǵalysyna shekteý qoıyldy,
dep habarlady «Qazaqavtojol» RMK baspasóz qyzmetinen.
Atap aıtqanda, Almaty oblysynda 21 jeltoqsan kúngi saǵat 09.40-tan bastap qolaısyz aýa raıyna (burqasyn boran, jol kórinisiniń shektelýi) baılanysty "Úsharal-Dostyq" jolynyń 93-184 shaqyrylymy aralyǵynda avtokóliktiń barlyq túrleri úshin jol qozǵalysyna shekteý qoıyldy.
Al 23 jeltoqsan kúni saǵat 12.00-den bastap qolaısyz aýa raıyna (jańbyr, kóktaıǵaq) baılanysty «Ekaterınbor-Almaty» jolynyń 2436-2214 shaqyrymy aralyǵynda avtokóliktiń barlyq túrleri úshin jol qozǵalysy shekteldi.
Sol kúni 13.30-dan bastap qolaısyz aýa raıyna (jańbyr, kóktaıǵaq) baılanysty «Almaty-Kókpek-Kóktal» jolynyń 70-164 shaqyrymynda, "Molovodnyı-Shelek" aralyǵynda avtokóliktiń barlyq túrleri úshin jol qozǵalysy jabyldy. Biraq sol kúni saǵat 14.25-ten bastap 70-126 shaqyrylym aralyǵynda shekteý alyndy.
23 jeltoqsan saǵat 20.25-ten bastap qolaısyz aýa raıyna (jańbyr, kóktaıǵaq) baılanysty «Almaty-Óskemen» jolynyń 78-558 shaqyrymynda "Qapshaǵaı beketi- Úsharal beketi" aralyǵynda avtokóliktiń barlyq túrleri úshin jol qozǵalysyna shekteý qoıyldy. Shekteý búgin tańerteńgi saǵat 07.35-ten bastap 78-259 shaqyrymda alyndy.
Jambyl oblysynda keshe saǵat 20.15-ten bastap qolaısyz aýa raıyna (kóktaıǵaq) baılanysty «Ekaterınbor-Almaty» jolynyń 2214-2120 shaqyrymynda "Almaty obl. shekarasy-Úlken" aralyǵynda avtokóliktiń barlyq túrleri úshin jol qozǵalysy shekteldi. Atalǵan joldarda avtokólikterdiń úzdiksiz jol qozǵalysyn qamtamasyz etý maqsatynda «Qazaqavtojol» RMK-nyń JPB (Jol paıdalaný bólimshesi) arnaıy qar tazalaý tehnıkalary kezekshilikke shyqty.
