Respýblıkalyq mańyzy bar barlyq joldar kólikter úshin qaıta ashyldy
ASTANA. 11 jeltoqsan. QazAqparat - Búgin tańerteńgi saǵat 07:00-den bastap elimizdiń respýblıkalyq joldarynda kólik qozǵalysy jandandy.
Eske salaıyq, keshe keshqurym aıazǵa jáne boranǵa baılanysty birqatar respýblıkalyq joldar jabylǵan bolatyn. Qazirgi kezde bul joldardyń barlyǵy ashyldy, dep habarlaıdy «Qazaqavtojol» RMK-nyń baspasóz qyzmeti.
Máselen, 11 jeltoqsan kúni 18:30-dan bastap aýa temperatýrasynyń kúrt tómendeýine oraı Pavlodar oblysynyń barlyq baǵyttarynda avtokóliktiń barlyq túrleri úshin jolǵa shyǵýǵa tyıym salynǵan edi.
Al Shyǵys Qazaqstan oblysy aýmaǵyndaǵy aıazdyń saldarynan keshe 18:30-dan beri «Omby-Maıqapshaǵaı» avtojolynyń 587-733 shaqyrymyndaǵy «Pavlodar oblysy shekarasy-Semeı» ýchaskesi aralyǵynda qoǵamdyq jáne dızel otynymen júretin avtokólikterdiń qozǵalysyna shekteý engizilgen bolatyn.
Budan bólek, boranǵa baılanysty "Qaraǵandy-Aıagóz-Buǵaz" avtojolynyń 525-704 shaqyrymyndaǵy "Barshatas-Aıagóz" ýchaskesi aralyǵynda avtokóliktiń barlyq túrleri úshin jol jabylǵan.
Sonymen qatar, keshe keshqurym qatty aıazǵa baılanysty Qaraǵandy oblysy aýmaǵyndaǵy joldarda qoǵamdyq, júk jáne dızel otynymen júretin kólikterdiń qozǵalysyna tyıym salynǵan edi. Munymen qosa, saǵat 19:00-den bastap aýa temperatýrasynyń kúrt tómendeýine baılanysty Qostanaı oblysynyń barlyq baǵyttarynda qoǵamdyq jáne dızel otynymen júretin avtokólikterdiń qozǵalysyna tyıym salyndy. Buǵan qosa, dál osyndaı shekteý Astanadan shyǵatyn barlyq baǵyttarǵa da engizilgen bolatyn.
