Respýblıkalyq mańyzy bar avtojoldardaǵy jaǵdaılar qalypty - Kólik jáne kommýnıkatsııa mınıstrligi
ASTANA. Aqpannyń 10-y. QazAqparat - Aýa raıynyń qolaısyzdyǵyna (jyldamdyǵy 25 m/s uıytqyma jel, qarly burqasyn) jáne joldyń kóriný múmkindiginiń shektelýine baılanysty kesheli beri, ıaǵnı aqpannyń 9-y kúni saǵat 09.30-ten bastap «Qaraǵandy-Aıagóz-Buǵaz» avtojolynyń «Barshatas-Aıagóz» ýchaskesinde barlyq avtokólik túrlerine qozǵalys jabyldy,
dep habarlady Kólik jáne kommýnıkatsııa mınıstrliginiń baspasóz qyzmetinen.
Bul ýchaskede «Qazaqavtojol» kásipornynyń 7 jol-paıdalaný tehnıkasy turaqty rejimde jumys jasaýda. Jolaýshylarǵa ýaqtyly kómek kórsetý maqsatynda jol boıyn turaqty aralap otyrý sharasy jolǵa qoıylǵan.
Aqpannyń 9-nan 10-yna qaraǵan túni keıbir jerlerde aýa temperatýrasynyń 46 gradýsqa deıin tómendeýine baılanysty, Shyǵys Qazaqstan, Soltústik Qazaqstan oblystary boıynsha tutastaı, Astana, Qaraǵandy, Kókshetaý, Pavlodar qalalarynan jolaýshylar jáne dızeldi kólikterdiń tún mezgilindegi qozǵalysy shektelgen bolatyn. Qazirgi ýaqytta shekteýler alynyp tastaldy.
Respýblıkalyq mańyzy bar basqa avtojoldarda jol ashyq.
