Respýblıkalyq mańyzy bar avtomobıl joldarynda jol qatynasyna shekteý joq - Kólik jáne kommýnıkatsııa mınıstrligi
ASTANA. 10 qańtar. QazAqparat - Keshe Kólik jáne kommýnıkatsııa mınıstri Berik Kamalıev avtomobıl joldaryn qysta kútip ustaý jáne respýblıkalyq avtojoldardaǵy jol qatynasynyń aǵymdaǵy jaǵdaıy jaıly keńes ótkizdi.
Bul týraly vedomstvonyń baspasóz qyzmeti habarlaıdy.
Keńeske «Qazavtojol» respýblıkalyq memlekettik kásiporny jáne onyń fılıaldary, avtomobıl joldary komıtetiniń oblystyq departamentteriniń basshylary qatysty. Jıyn barysynda jol qozǵalysyna qatysýshylardy joldaǵy jaǵdaı jóninde aqparattandyrý maqsatynda «Qazavtojol» kásiporny aýa raıy týraly aqparat beretin 33 jaryqdıodty jol belgilerin satyp alyp, olardy ornatýǵa kiriskendigi aıtyldy. Sonymen qatar kún saıyn «Qazavtojol» kásipornynyń saıtynda respýblıkalyq joldardyń operatıvti jaǵdaıy týraly aqparat ornalastyrylyp otyrady. Aýa raıynyń qolaısyzdyǵynan jabylǵan kúrdeli jol ýchaskelerin kórsetip turatyn beınetúsirilimderdi kórsetý tájirıbesi de engizilgen.
Buǵan qosa tıisti aımaqtarda 53 myń sharshy metr qar toqtatatyn ýaqytsha qalqandar ornatylyp, qardan qorǵaıtyn 4 myń shaqyrym orlar qazyldy jáne 22 shaqyrym tosqaýyl qabyrǵalar turǵyzyldy.
Shyǵys Qazaqstan oblysynda jol qyzmetindegilerge joldy qardan tazartý barysynda, sondaı-aq, kólik júrgizýshileri aýa raıynyń qolaısyz kezinde (qar, boran, joldyń nashar kórinýi) baǵyt-baǵdaryn aıyryp otyrý úshin 3 myńnan astam boıalǵan aǵash belgilerin ornatý jumystary júzege asyrylýda. Búgingi kúni respýblıkalyq mańyzy bar avtomobıl joldarynda jol qatynasyna shekteý joq. Keńesti qorytyndylaı kele, B.Kamalıev avtomobıl joldary komıtetiniń oblystyq departamentteri, sondaı-aq «Qazavtojol» RMK fılıaldarynyń basshylaryna aldaǵy saılaýǵa ázirlik, ony ótkizý jáne qorytyndylaý kúnderi respýblıkalyq jáne jergilikti mańyzy bar barlyq avtomobıl joldarynda qatynas ornatýdy qamtamasyz etý úshin qajetti sharalardy iske asyrýdy tapsyrdy. Ol úshin salanyń barlyq tehnıkasy men adamı resýrstaryn jumyldyrý qajet.
