Respýblıkalyq mańyzy bar 7 myń km jolda jóndeý, qaıta salý jumystary júrgizilýde
Mınıstr «Qyzylorda – Jezqazǵan» avtojolynyń qurylysy tolyqtaı óz baqylaýynda ekenin atap ótti.
«Ótken aptada «Qyzylorda – Jezqazǵan» avtojolyna qatysty jazbany kózim shalyp qaldy. Ózderińiz biletindeı, qaı joldyń máselesi bolsyn, maǵan tańsyq emes. Uzyndyǵy 412 shaqyrymdy quraıtyn avtojol ýchaskesi ótken ǵasyrdyń 70-i jyldary salynǵan. Joba 10 ýchaskeden turady. Atap aıtqanda, Qyzylorda oblysynyń aýmaǵynda — 6, Qaraǵandy oblysynda 4 ýchaske. Jobalardyń jalpy quny 108 mlrd teńge, onyń sheńberinde 2 kólik aıryǵy, 3 kópir, 45 temirbeton qubyr men 6 demalys alańyn salý kózdelip otyr.
Joldyń jaǵdaıynan tolyq habardarmyn ári bul máseleni ózimniń jeke baqylaýymda ustap otyrmyn. Ádette jumys saparlary barysynda óńirlerdegi jol qurylysyn tekserip, nátıjelerin áleýmettik jelidegi paraqshalarymda jarııalap otyratynymdy bilesizder. Óıtkeni buryn-sońdy jazǵanymdaı, jol jóndeý jumystaryn óńirlerge baryp, óz kózińmen kórý áldeqaıda tıimdi. Shynyn aıtqanda, jumys ornynda otyryp, máseleni syrttaı baqylap tapsyrma berý bir basqa, «100 ret estigenshe, bir ret kór» demekshi, jumystar júrgizilip jatqan jerge kelip, óz kózińmen kórý bólek», - dedi IIDM basshysy.
Odan bólek Qaıyrbek Óskenbaev elimizdiń mańyzdy kólik arterııalarynda júrip jatqan jumystar týraly jazdy. Olar mynalar:
«Jalpy, bıyl jol-qurylys jumystarymen 11,2 myń km qamtyldy, onyń ishinde respýblıkalyq jeli boıynsha 7 myń shaqyrym. Atap aıtsam, qaıta qurý jumystarymen 4 myń km qamtylsa, jóndeý jumystary 3 myń shaqyrymda júrgizilýde.
Avtojol ınfraqurylymyn damytý – jumys barysyndaǵy basym baǵyttardyń biregeıi bolyp tabylady. Máselen, «Almaty – Qaraǵandy», «Aqtóbe – Qandyaǵash – Maqat» jáne «Taldyqorǵan – Óskemen» sııaqty magıstraldyq marshrýttarda bastalǵan rekonstrýktsııalaý jumystarynyń sapaly júrgizilip, ýaqtyly aıaqtalýy mınıstrligimizdiń erekshe baqylaýynda.
«Ortalyq – Ońtústik», «Aqtóbe – Atyraý – Astrahan», «Taldyqorǵan – Qalbataý – Óskemen», «Uzynaǵash – Otar», «Úsharal – Dostyq», «Qostanaı – Denısovka» jobalary aıasynda respýblıkalyq mańyzy bar joldar tolyq aýqymdy jumystarmen qamtylyp otyr.
Respýblıkalyq mańyzy bar «Qaraǵandy – Balqash» trassasynyń barlyq boıynda qurylys jumystary júrgizilýde. Bıyl arnaıy tehnıka sanyn úsh esege, jol jumysshylarynyń sanyn tórt esege arttyrdyq. Jyl sońyna deıin 45 shaqyrymda qozǵalysty jandandyryp, 127 km paıdalanýǵa berý josparlanǵan.
«Taldyqorǵan – Qalbataý – Óskemen» jobasy boıynsha. Búgingi tańda «Taldyqorǵan – Óskemen» ýchaskesinde 593 km joldyń tómengi qabaty boıynsha qozǵalys ashylǵan. Qurylysty 2023 jyldyń sońynda aıaqtaýdy josparlap otyrmyz».
Sondaı-aq, mınıstr joǵaryda atalǵan jobalar boıynsha jol jóndeý jumystaryna tartylǵan merdiger uıymdardyń óz mindettemelerin oryndamaýyna baılanysty qurylys jumystary óte baıaý júrgizilip, jyldyń basynan bastap tipti de toqtatylǵanyn aıtty.
Odan bólek mınıstr «Atyraý-Astrahan» avtojolyn sapasy ne sebepti nasharlaǵanyn atap ótti: ««Aqtóbe – Atyraý – Astrahan» jobasy sheńberindegi «Atyraý-Astrahan» avtojolyna keletin bolsaq, ekonomıka men saýda qatynastarynyń damýyna baılanysty joldaǵy tranzıttik kólik quraldarynyń qozǵalys qarqyndylyǵy arta túsken. Bul óz kezeginde joldyń ótkizý qabilettiliginiń tómendep, jol sapasynyń aıtarlyqtaı nasharlaýyna ákep soqqan».
Sondaı-aq, Qaıyrbek Óskenbaev «Úsharal – Dostyq» avtojolynyń, «Qostanaı – Denısovka» avtojolynyń qurylysy týraly málimet berdi.
««Úsharal – Dostyq» jobasy boıynsha 30-60 (30 km) km ýchaske paıdalanýǵa berildi. 2,9-30 km (27,1 km) ýchaskesinde merdiger «Qyran» JShS jumys jasap jatyr. Atalǵan nysan tamyz aıynda aıaqtalyp, paıdalanýǵa berildi. Jobany 2023 jyly tolyq aıaqtaý kózdelip otyr.
«Qostanaı – Denısovka» jobasy boıynsha búgingi tańda 392-457 (65 km) jáne 509-515 (5 km) km ýchaskeleri paıdalanýǵa berildi. Jumystar 459-484 (24 km) km ýchaskesinde merdiger «Kazahdorstroı» seriktestigimen júrgizilýde. Joldy jyldyń sońyna deıin paıdalanýǵa berip, qozǵalysty ashý josparlanýda» dedi ol.
