Respýblıkalyq mańyzdaǵy joldardyń 396 ýchaskesinde sý tasqynynyń qaýpi bar

ASTANA. QazAqparat – Respýblıkalyq mańyzdaǵy joldardyń 396 ýchaskesinde sý tasqynynyń qaýpi bar. Úkimet otyrysynda Indýstrııa jáne ınfraqurylymdyq damý mınıstri Marat Qarabaev osynda derek keltirdi, dep habarlaıdy QazAqparat tilshisi.

«Respýblıkalyq joldardyń uzyndyǵy 25 myń shaqyrymdy quraıdy, tekserýlerdiń nátıjeleri boıynsha aqpan aıynda 396 qaýipti ýchaski, 68 kópir men 768 sý ótkizgish qubyrlar anyqtaldy. Osy nysandarǵa 700-den astam jol-paıdalaný tehnıkalary bekitildi. Sý tasqynyna qarsy is-sharalardy ýaqtyly qamtamasyz etý úshin barlyq qaýipti ýchaskelerde táýlik boıy kezekshilik pen kúndelikti qaraý júrgizilýde», - dedi ol.

Mınıstrdiń málimeti boıynsha, sý tasqyny qaýpin joıý úshin barlyq qajetti ınertti jáne basqa da materıaldar tolyq kólemde daıyndalǵan.

«20 myń tekshe metr qum, 6 myń tekshe metr taý tas, 8 myń tekshe metr qıyrshyq tas, 18 myń tekshe metr qum-qıyrshyq tas jáne 125 myń dana qum salynǵan qap daıyndaldy. Qazirgi tańda ońtústik óńirlerde barlyq sý ótkizgish qubyrlar tasqyn jáne erigen sýlardyń ótýin qamtamasyz etýde, soltústik óńirlerde aýa raıy jaǵdaıyna baılanysty 5 myń 742 sý ótkizgish qubyrlarynyń sańylaýlaryn ashý men qardan tazartý jumystary bastaldy», - dedi Marat Qarabaev.