Respýblıkalyq mańyzdaǵy normatıvke sáıkes joldardyń úlesi 91 paıyzǵa jetti
Bul týraly QR Indýstrııa jáne ınfraqurylymdyq damý mınıstrligi Avtomobıl joldary komıteti tóraǵasynyń orynbasary Amangeldi Bekov málim etti, dep habarlaıdy QazAqparat tilshisi.
«Elimizdegi avtomobıl joldarynyń jalpy uzyndyǵy 96 myń shaqyrymdy qurap otyr. Sonyń 25 myń shaqyrymy - respýblıkalyq mańyzy bar joldar, al 71 myń shaqyrymy oblystyq jáne aýdandyq mańyzy bar joldar sanatynda. Respýblıkalyq mańyzy bar joldar Indýstrııa jáne ınfraqurylymdyq damý mınıstrligi Avtomobıl joldary komıtetiniń qaramaǵynda. Memlekettik tapsyrys aıasynda damytý jáne kútip-ustaý jónindegi jumystardy uıymdastyrýdy Ulttyq operator «QazAvtoJol» Ulttyq kompanııasy júzege asyrady. Oblystyq jáne aýdandyq mańyzy bar avtojoldardy, sondaı-aq kóshe-jol jelisi jergilikti atqarýshy organdardyń qaraýynda», - dedi A. Bekov Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, 2022 jyly respýblıkalyq jeli boıynsha 11,6 myń shaqyrym jol jóndeý jumystarymen qamtyldy. Onyń ishinde 4 myń shaqyrymynda qurylys jáne rekonstrýktsııa eskerilgen. Sonyń 1,2 myń shaqyrymynda negizgi jumystar aıaqtaldy. Kúrdeli jáne ortasha jóndeýmen 3 myń shaqyrym jol qamtylyp, onyń 679 shaqyrymy tapsyryldy.
Sonymen qatar, byltyr jergilikti avtojoldar jelisinde jóndeýdiń barlyq túrlerimen 4,6 myń shaqyrym jol qamtyldy, onyń ishinde 3 myń shaqyrymy paıdalanýǵa berildi.
«Jyl qorytyndysy boıynsha normatıvtik jaǵdaıdaǵy joldardyń úlesi respýblıkalyq jeli boıynsha 91 paıyzǵa deıin, al jergilikti jeli boıynsha 85 paıyzǵa deıin ulǵaıtyldy», - dedi Amangeldi Bekov.
