Respýblıkalyq Quran jarysyna qatysatyn astanalyqtardyń esimderi belgili boldy
ASTANA. 15 tamyz. QazAqparat - Qazaqstan musylmandary dinı basqarmasy qasıetti Qurandy jatqa oqýdan V respýblıkalyq jarys ótetindigi týraly jarııalaǵan bolatyn.
Naqtyraq aıtsaq, Quran oqý jarysy 2013 jyldyń 21-23 tamyz kúnderi Almaty ortalyq meshitinde ótedi dep belgilengen-di. Oǵan deıingi irikteý týry ár óńirlerde ótýde.
Osyǵan oraı, 14 tamyz kúni Astana qalasynda V respýblıkalyq Qurandy jatqa jáne mánerlep oqý jarysynyń Astana qalasy boıynsha irikteý baıqaýy ótti. Oǵan bas-aıaǵy 20 úmitker qatysty.
Dálirek aıtsaq, 30 para baǵyty boıynsha úsh úmitker, 10 para baǵyty boıynsha eki úmitker, 5 para baǵyty boıynsha bes úmitker, mánerlep oqý baǵyty boıynsha on úmitker qatysty.
Áýeli «Nur Astana» ortalyq meshitiniń naıb ımamy Tólebı Ospan respýblıkalyq Quran jarysynyń talaptarymen tanystyryp, irikteý týrynan ótken qarılarǵa ǵana joldama beriletindigin jetkizdi.
«Atalmysh irikteý týrynda 20 úmitker ózara baq synasyp kórdi. Baby men baǵy janǵan tórt azamat synnan súrinbedi. Qurannyń 30 parasy boıynsha Aǵzam Ismaılov, 10 para baǵyty boıynsha Samat Áshimjan, 5 para baǵyty boıynsha Imanáli Myrzageldi men Mýhammad Smaǵulovqa joldama berildi», dep jazady muslim.kz.
Sondaı-aq, mánerlep oqý baǵyty boıynsha 2 úmitker respýblıkalyq Quran jarysyna joldamany jeńip aldy.
