Respýblıkalyq konkýrstyq komıssııa eki JOO-nyń rektoryn tańdady

ASTANA. QazAqparat - Búgin Qazaqstan vıtse-premeri Imanǵalı Tasmaǵambetovtiń tóraǵalyǵymen joǵary oqý oryndarynyń rektory laýazymyna úmitkerlerdi anyqtaý jónindegi respýblıkalyq konkýrstyq komıssııanyń alǵashqy otyrysy ótti. Komıssııa H. Dosmuhamedov atyndaǵy Atyraý memlekettik ýnıversıtetiniń jáne Qostanaı memlekettik pedagogıkalyq ınstıtýtynyń rektorlaryn usyndy.

Komıssııanyń qaraýyna 21 úmitkerdiń qujattary kelip tústi. Atap aıtqanda, H. Dosmuhamedov atyndaǵy Atyraý memlekettik ýnıversıtetinen - 5 adam, І. Jansúgirov atyndaǵy Jetisý memlekettik ýnıversıtetinen - 5, Qostanaı memlekettik pedagogıkalyq ınstıtýtynan - 6 jáne Pavlodar memlekettik pedagogıkalyq ınstıtýtynan - 5 úmitker usynyldy.

Eske sala ketsek, jańa talaptarǵa sáıkes rektorlardyń taǵaıyndalýy ashyq konkýrs negizinde júrgiziledi. Respýblıkalyq komıssııa qaraýyna joǵarǵy oqý ornynyń baqylaýshy keńesi úshten kem emes kandıdatty usynady. Komıssııa qatysýshylardyń oqý ornyn damytý baǵdarlamasyn tyńdap, suqbat júrgizedi. Sonyń nátıjesinde JOO-nyń rektory laýazymyna kandıdatty anyqtaıdy.
  

Ótken aıda JOO-nyń baqylaýshy keńesteriniń otyrystary ótkizildi, onda úmitkerler usynǵan oqý ornyn damytý baǵdarlamalary qaraldy. Onyń qorytyndysynda JJO-nyń baqylaýshy keńesteri qupııa daýys berý arqyly Respýblıkalyq komıssııa qaraýyna usyný úshin kandıdattardy anyqtady. Aıta keteıik, JOO-nyń rektorlary daýys berýge qatysqan joq.

Baqylaýshy keńesterdiń hattamalyq sheshimderi barlyq qujattarymen birge Respýblıkalyq komıssııaǵa usynyldy. H. Dosmuhamedov atyndaǵy Atyraý memlekettik ýnıversıtetinen usynylǵan 5 adamnyń ishinen 2 úmitker, І. Jansúgirov atyndaǵy Jetisý memlekettik ýnıversıtetinen usynylǵan 5 adamnyń ishinen 2 úmitker, Qostanaı memlekettik pedagogıkalyq ınstıtýtynan 6 adamnyń 3-ýi,  Pavlodar memlekettik pedagogıkalyq ınstıtýtynyń 5 úmitkeri ishinen 1 kandıdattyń qujaty usynyldy.

«Sizder oqý ornynyń pedagogıkalyq baǵytyn saqtap qalýdyń mańyzyn eskerýlerińiz qajet. Eger de sizder zań jáne ekonomıka sııaqty jańa tanymal mamandyqtardy engizýge umtylatyn bolsańyzdar, ózderińiz basshylyq etip otyrǵan oqý ordasynyń negizgi ornyn joǵaltyp alasyzdar. Óıtkeni, kez-kelgen kásiptiń negizi ustaz sanalady» - dedi JOO-nyń damý baǵdarlamasyn talqylaý barysynda sóz alǵan Imanǵalı Tasmaǵambetov.

Bul jańashyldyq qazaqstandyq joǵarǵy oqý oryndarynyń basqarý quramyn sapaly toltyrý jáne basqarý derbestigin ulǵaıtý, sondaı-aq, qoǵam aldyndaǵy eseptilikti kúsheıtý qajettiginen týyndap otyr.

Buǵan deıin memlekettik joǵarǵy oqý oryndarynyń rektorlary QR Bilim jáne ǵylym mınıstriniń jeke sheshimimen taǵaıyndalyp keldi. Sondyqtan, rektorlar korpýsynyń biraz bóligi atalǵan laýazymda 3 jyl saıyn 2 merzimnen asa ýaqyt ıelenip keldi. Nátıjesinde búgingi tańda rektorlardyń 40 paıyzy zeınet jasynda nemese zeınetke deıingi jasta, bul óz kezeginde basqarý utqyrlyǵyn tómendetedi.

JOO-nyń damý baǵdarlamasyn talqylaý jáne suqbat qorytyndysy boıynsha Respýblıkalyq konkýrstyq komıssııa bos laýazymdarǵa usynylǵan úmitkerlerdi qarap, H. Dosmuhamedov atyndaǵy Atyraý memlekettik ýnıversıtetiniń rektory laýazymyna taǵaıyndaýǵa Taltenov Abzal Ahatulyn, Qostanaı memlekettik pedagogıkalyq ınstıtýtynyń rektory laýazymyna Ábil Erkin Amanjolulyn usyndy.

Sonymen qatar, І. Jansúgirov atyndaǵy Jetisý memlekettik ýnıversıteti men Pavlodar memlekettik pedagogıkalyq ınstıtýtynyń rektory laýazymdaryna kandıdattar anyqtalǵan joq. Osyǵan oraı, QR Bilim jáne ǵylym mınıstrligine konkýrsty jaramsyz dep taný jáne ony qaıta ótkizý tapsyryldy.