Respýblıkalyq komıssııa 256 úmitkerge «Bolashaq» stıpendııasyn taǵaıyndaý týraly sheshim qabyldady
ASTANA. 22 jeltoqsan. QazAqparat /Rýslan Ǵabbasov/ - Búgin Aqordada QR Memlekettik hatshysy-Syrtqy ister mınıstri Qanat Saýdabaevtyń tóraǵalyǵymen ótken Shetelde kadrlar daıarlaý jónindegi respýblıkalyq komıssııasynyń otyrysynda 256 úmitkerge «Bolashaq» stıpendııasyn taǵaıyndaý týraly sheshim qabyldandy.
«Bolashaq» stıpendııasynyń túlekteri elimiz ekonomıkasynyń túrli salalarynyń damýynda laıyqty óz úlesterin qosyp keledi. Búgingi otyrysta osy stıpendııa taǵaıyndalatyn úmitkerlerdiń ótinimderin qarastyrdyq»,-dedi Memlekettik hatshy.
Taratylǵan málimetterge qaraǵanda, «Bolashaq» baǵdarlamasyna úmitkerlerdiń kópshiligi qujattaryn Ulybrıtanııa, Reseı jáne Kanada memleketteriniń oqý oryndaryna tapsyrǵan. Úmitkerler «Aqparattyq tehnologııalar men júıeler», «Memlekettik basqarý», «Munaı-gaz isi», «Qurylys jáne sáýlet», «Quqyq», «Bıotehnologııa», «Ekonomıka», «Matematıka» mamandyqtaryn ózderiniń oqý úderisinde basymdyqty pánder retinde belgilegen.
Q. Saýdabaev «Nazarbaev Ýnıversıteti» ashylǵanyn aıta kele, «bul oqý orny eń joǵary halyqaralyq talaptarǵa saı mamandyqtardy daıarlaıdy. Atap aıtqanda, oqý orny otandyq sapaly joǵary bilimniń lokomotıvi bolmaq»,- dedi. Memlekettik hatshynyń aıtýynsha, «Nazarbaev Ýnıversıtetindegi» stýdentterdiń sany artqan saıyn sáıkes mamandyqtar boıynsha «Bolashaq» baǵdarlamasy aıasynda granttar qysqaratyn bolady. Osy oraıda endi atalǵan ýnıversıtette oqytylatyn mamandyqtar «Bolashaq» baǵdarlamasy aıasynda shetelge iriktelinbeýi múmkin. Q. Saýdabaev bul turǵyda baǵdarlama boıynsha stıpendııa ıelerin irikteýdiń jáne olardy shetelge jiberýdiń ustanymdary qaıta qarastyrylýy kerektigin aıtyp ótti.
