Respýblıkalyq qatynastaǵy avtojoldardyń ishinde Shyǵys Qazaqstan jáne Almaty oblystaryndaǵy joldar edáýir zardap shekti

dep habarlaıdy QazAqparat.

Kólik jáne kommýnıkatsııa mınıstrliginiń málimetine qaraǵanda, mol jáne úzdiksiz jaýyn-shashyn men aýa raıynyń kúrt ózgerip otyrýy saldarynan bıylǵy kóktemde biraz óńirlerdegi kólik qatynasynyń qıyndaýyna ákelip soqty. Respýblıkalyq qatynastaǵy avtojoldardyń ishinde Shyǵys Qazaqstan jáne Almaty oblystaryndaǵy joldar edáýir zardap shekti. Batys Qazaqstan, Jambyl, Qaraǵandy oblystaryndaǵy úıilgen qardyń qalyńdyǵy men sý tasqyndary avtokólikterdiń qozǵalysyna edáýir qıynshylyqtar týǵyzdy.

«Osy jaǵdaılardyń saldarynan naýryzdyń 24-indegi jaǵdaı boıynsha respýblıkada jalpy 29 jol nysanyna zaqym keldi. Onyń ishinde Almaty jáne Shyǵys Qazaqstan oblystarynda 2 kópir, 4 kópirge kireberis, sonymen qosa 3 qubyr shaıylyp ketti. Tasqyn sýdyń zardabynan avtomobıl joldarynyń 20 ýchaskesi buzyldy. Aldyn ala esepterge qaraǵanda (24.03.10 j. kúngi málimet boıynsha) keltirilgen nuqsannyń somasy 1,7 mlrd. teńge bolyp otyr»,- delingen mınıstrlik málimetinde.

Aıta keteıik, Almaty oblysynda 23 búlingen ýchaskeniń búgingi kúnge 19-y qalpyna keltirildi. Al qalpyna keltirýge birshama ýaqyt qajet etetin 4 ýchaskede qatynas aınalma jol arqyly qamtamasyz etilgen. Qazirgi ýaqytta Qaraǵandy oblysyndaǵy úsh ýchaskeniń ekeýinde qatynas ornatyldy, bireýinde qalpyna keltirý jumystary júrgizilýde. Jambyl oblysyndaǵy 1 búlingen ýchaske qalpyna keltirildi. Shyǵys Qazaqstan oblysynda edáýir jumys kólemin atqarýǵa týra keledi, onda shaıylyp ketken kópirdiń ornyna qozǵalysty qamtamasyz etý jumystary júrgizilýde. Qazirgi kezde aınalma jol salý isi bastaldy. Joldyń shaıylyp ketken ýchaskesin qalpyna keltirý jumystary Batys Qazaqstan oblysynda da júrgizilýde.