Respýblıkalyq hakatonda kásipkerler jetistikke jetý qupııalarymen bólisýde
QARAǴANDY. QazAqparat – Qaraǵandyda E. Bóketov atyndaǵy Qaraǵandy Memlekettik ýnıversıtetinde Respýblıkalyq hakaton bastaldy. Oǵan Nur-Sultan, Qaraǵandy jáne Pavlodar oblystarynan, barlyǵy 200 adam qatysýda, dep habarlaıdy QazAqparat tilshisi.
Qatysýshylar eki kún qatarynan aýyl sharýashylyǵy jáne ónerkásip salasyndaǵy jobalarmen jumys isteıtin bolady. Negizgi mindet – iri ónerkásip kásiporyndarynyń jumysyn ońtaılandyrýǵa múmkindik beretin naqty eginshilikte jańa mehanızmder men júıelerdi ázirleý.
Qatysýshylardyń barlyǵy 18-29 jas aralyǵyndaǵy ónertapqyshtar. Olardyń arasynda stýdentter de, jas mamandar da bar.
«Men osynda jas startaperlerge kómektesý úshin keldim. Óz jolymdy bastaǵanda, osyndaı is-sharalarǵa qatysyp, mentorlar óte jaqsy kómektesken bolatyn. Olardyń keńesteriniń arqasynda kóp nárseni bildim jáne túsindim. Qazir mende bilim berý salasyndaǵy IT-sheshimderdi ázirleýmen aınalysatyn Millennium education technologies atty óz kompanııam bar. Óz kásipkerlik jolyn bastaǵan, óz isin ashýdy armandaǵan adamdarǵa kómektesý meniń boryshym dep sanaımyn», - dedi kásipker Dımash Júnisov.
Hakatonnyń birinshi kezeńinde spıkerler sóz sóıledi. Mamandar sáttilikke jetý qupııalarymen bólisti. IT-tehnologııalar salasyndaǵy ózekti baǵyttar týraly aıtyldy. Jáırem KBK Avtomattandyrý jáne baılanys basqarmasynyń bastyǵy Asqar Aýjanovtyń aıtýynsha, jas mamandar úshin qazir eshqandaı kedergi joq.
«Qaraǵandyda, jalpy Qazaqstanda tanysyńyz bolmasa, kóp aqsha tabý múmkin emes degendi kóp estımin. Bul – olaı emes. Men laıyqty jalaqy alamyn, meniń mıllıondaǵan jalaqy alatyn áriptesterim, tanystarym bar. Jáne odan da kóp tóleýge daıyn kompanııalar bar. Biraq eger maman shynymen joǵary bilikti bolsa, onda úlken portfolıo, áserli bekgraýnd bolsa ǵana. Eger siz óz isine nemquraıly qaraıtyn maman bolsańyz, onda siz qaıda kóship barmasańyz da baıyp, kóp aqsha taba almaısyz. Kerisinshe, eger siz joǵary bilikti qyzmetker bolsańyz, onda siz úıden, týǵan qaladan jáne álemniń kez kelgen núktesinen jumys isteı alasyz – frılans qazir shekara men kedergilerdi joıady. Árkimge óz Otanynda bolǵan bóten elde bolǵannan góri anaǵulym jaqsy. Munda otbasyńyz, dostaryńyz, úırenshikti mentalıtet qalyptasqan. Tabys pen baılyqtyń jalǵyz kilti - bilim men ózińizdiń bilimińizdi arttyrý. Árqashan ózimizge jumys jasap, kásibı turǵyda ósýimiz kerek», - dedi ol.
Spıkerler qatarynda aýyl sharýashylyǵy salasynyń ókilderi de boldy.
Baıandamalardan soń qatysýshylar jobalarmen jumys isteýge kiristi. Olar atalmysh tapsyrmalaryn komandalarǵa birigip atqarady. Úzdik ıdeıalardyń avtorlary bir mıllıon júlde qoryn ózara teń bólisip alady. Eń perspektıvaly ázirleýshilerge olardyń jobalaryn patentteýge jáne ilgeriletýge kómek kórsetiledi.
