Respýblıkalyq dıagnostıkalyq ortalyq áleýmettik kómekke muqtaj qyzmetkerlerge arnalǵan ashyq esik kúnin ótkizip jatyr
ASTANA. 16 naýryz. QazAqparat /Aınur Kenebaeva/ - Búgin Astanada Respýblıkalyq dıagnostıkalyq ortalyq «Ulttyq medıtsınalyq holdıngi» AQ-nyń áleýmettik kómekke muqtaj qyzmetkerlerine arnalǵan «Kóp balaly analar men balalarǵa qoldaý kórseteıik» atty ashyq esik kúnderin ótkizip jatyr.
16 naýryz kúni saǵat 9-ben 17-niń aralyǵynda holdıngtiń áleýmettik kómekti qajet etetin qyzmetkerleri joǵary dárejeli mamandardan medıtsınalyq keńes alyp, tekseristen ótýge múmkindik alǵan.
«Búgin biz aımaqtyq medıtsınalyq mekemelerdiń joldamasymen ǵana kórsetiletin medıtsınalyq qyzmetti qoljetimdi etip otyrmyz, ıaǵnı bizdiń qyzmetkerlerimiz ózderiniń turǵylyqty jerindegi emhanalardan aldyn ala tekseristen ótpeı-aq, birden bilikti mamandardan tolyqqandy keńes alyp, tekseristen ótedi», - dedi «Ulttyq medıtsınalyq holdıngi» AQ Basqarma tóraǵasynyń orynbasary Tamara Voşenkova jýrnalısterge bergen suhbatynda.
Tamara Voşenkova ashyq esik kúnderi sheńberinde kórsetiletin medıtsınalyq qyzmettiń eki baǵytta júretindigin aıtyp ótti. Birinshisi, dárigerlik keńes berý túrindegi qyzmetter, ekinshisi, bir kúnde aıaqtalatyn medıtsınalyq tekseris qyzmeti usynylmaq.
«Bir kúndik tekseris nátıjesinde tolyqqandy tekseristi qajet etetin jaǵdaı týyndasa, naýqastar ózge mamandandyrylǵan medıtsınalyq mekemeler qaraýyna jiberilip, emin jalǵastyra alady. Qyzmetkerlerge aktsııa sheńberinde kórsetiletin barlyq dárigerlik kómek túri tegin bolmaq», - dep naqtylady Tamara Voşenkova.
Búgin Respýblıkalyq dıagnostıkalyq ortalyq 500-ge jýyq dárigerlik keńes qyzmetin júzege asyrady dep josparlanǵan.
