Respýblıkalyq deńgeıde advokattar alqasy qurylady - J. Elımanov
ASTANA. 9 jeltoqsan. QazAqparat /Qanat Mámetqazyuly/ -Respýblıkalyq deńgeıde advokattar alqasy qurylatyn bolady.
Búgin QR Parlamenti Májilisinde «Bilikti zań kómegine quqyq jáne advokatýranyń táýelsizdigi» atty dóńgelek ústel barysynda «QR keıbir zańnamalyq aktilerine advokatýra máseleleri boıynsha ózgerister men tolyqtyrýlar engizý týraly» zań jobasyn tanystyrǵan Ádilet mınıstrligi Tirkeý qyzmeti jáne quqyqtyq kómek kórsetý komıteti tóraǵasynyń orynbasary Janat Elımanov osylaı málim etti.
«Atalǵan zań jobasy advokatýranyń qyzmetin jetildirýge baǵyttalady. Osy saladaǵy sybaılas jemqorlyq máselelerin tómendetip, keıbir normalarǵa tikeleı áser etý sharalary qarastyrylady. Bul rette eń aldymen respýblıkalyq deńgeıde advokattar alqasy qurylatyn bolady. Bul ne úshin qajet? Birinshiden, biz dál osy máselede halyqaralyq tájirıbeni salmaqtadyq. Barlyq derlik damyǵan shet memleketterde, advokattyq dástúrler tereń qalyptasqan elderde óńirlik advokattar birlestigi jumys isteıdi. Olar jergilikti jerlerdegi advokatýra qyzmetin úılestiredi, advokattardyń kásibı daıyndyǵyn qamtamsyz etedi. Bıliktiń ortalyq organdarynda, Parlamentte advokattyq qaýymdastyqtyń múddesin qorǵaıdy», dedi J. Elımanov. Onyń aıtýynsha, zań sheńberinde qurylýy josparlanǵan advokattardyń respýblıkalyq birlestigi kásibı ádep kodeksin ázirleıtin bolady. Búgingi kúnge deıin advokattyq qyzmet týraly zań jobasynda álgindeı kodeks qabyldaý týraly normalar engizilmegen eken.
