Respýblıkalyq bıýdjettiń shyǵystary 99,1% atqaryldy – Qarjy mınıstrligi

NUR-SULTAN. QazAqparat – Respýblıkalyq bıýdjettiń shyǵystary 8 trln 136 mlrd teńgeni qurady. Bul týraly Úkimet otyrysynda bıylǵy jeti aıdyń qorytyndysy boıynsha bıýdjettiń atqarylý jaıynda esep bergen QR Qarjy mınıstri Erulan Jamaýbaev málim etti, dep habarlaıdy QazAqparat tilshisi.

«Memlekettik bıýdjettiń shyǵystary 98,6 paıyzǵa, respýblıkalyq bıýdjettiń shyǵystary - 99,1 paıyzǵa, jergilikti bıýdjetterdiń shyǵystary 98,5 paıyzǵa atqaryldy. Respýblıkalyq bıýdjettiń shyǵystary 8 trln 136 mlrd teńgeni qurady. 74 mlrd teńgege atqarylmaǵan. Onyń ishinde únemdeý – 13 mlrd teńge, ıgerilmegeni – 61 mlrd teńge», - dedi mınıstr Úkimet otyrysynda.

Igerilmeýdiń negizgi sebepteri: konkýrstyq rásimderdi, sharttardy jasaý rásimderdi uzaq ótkizý, oryndalǵan jumystar aktilerin usynbaý, karantındik shekteýge baılanysty taýarlardy jetkizbeý.

Qarjy mınıstriniń aıtýynsha, jergilikti bıýdjetterdiń shyǵystary 4 trln 172 mlrd teńgeni qurady, 62 mlrd teńgege atqarylmaǵan.

«Bıyl óńirlerge somasy 2,3 trln teńgege nysanaly transfertter kózdelgen. Aldyn ala derekter boıynsha 1 tamyzdaǵy kezeńde olarǵa 1,1 trln teńge bólindi. Onyń ishinde 98,3 paıyzy ıgerilgen. Atqarylmaǵany – 19 mlrd teńge. Onyń ishinde únemdeý – 4 mlrd teńge, ıgerilmegeni – 15 mlrd teńge», - dep túsindirdi E. Jamaýbaev.