Respýblıkalyq bıýdjettiń kiristeri 10,5 paıyzǵa tómendedi

NUR-SULTAN. QazAqparat - Respýblıkalyq bıýdjettiń kiristeri 10,5 paıyzǵa tómendedi. Bul týraly Úkimet otyrysynda QR Premer-Mınıstriniń birinshi orynbasary - Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Memlekettik bıýdjettiń kiristeri eseptilik kezeńniń josparyna qaraǵanda 89,9, onyń ishinde respýblıkalyq kirister 78,8, jergilikti bıýdjetter 121,4 paıyzǵa oryndaldy. Ótken jyldyń uqsas kezeńimen salystyrǵanda memlekettik bıýdjettiń kiristeriniń ósý qarqyny 101,2, jergilikti bıýdjetter 133,1 paıyzdy qurady. Syrtqy faktorlardyń ekonomıkaǵa teris áserinen respýblıkalyq bıýdjettiń kiristeri 10,5 paıyzǵa tómendedi», - dedi ol.

Onyń dereginshe, respýblıkalyq bıýdjetke 1 trln 402 mlrd teńge kirister tústi. Jospar 378 mlrd teńgege oryndalmady. Olar negizinen salyqtar esebinen qalyptasty.

«Salyqtardyń oryndalmaýyna kelesideı syrtqy faktorlar áser etti. Birinshiden, koronavırýs epıdemııasynyn taralýy ımportqa salynatyn qosylǵan qun salyǵynyń kólemine teris áserin tıgizýde. Úshinshi elderden ákelinetin ımport kóleminiń qysqarýyna baılanysty 11,4 myń salyq tóleýshilerden salyq túsimderiniń kólemi 49,1 mlrd teńgege azaıdy. Budan basqa, esepti kezeńde Qytaıdan keletin avtokólik quraldarynyń sany 29 paıyzǵa kemidi», - dedi Qarjy mınıstri.

Ekinshiden, birinshi vıtse-premerdiń aıtýynsha, syrtqy naryqta negizgi eksporttyq pozıtsııalar boıynsha baǵalardyń tómendeýi: shıki munaıdyń – 22, myryshtyń – 21, mystyń – 9, alıýmınııdiń – 10, qorǵasynnyń – 10 jáne ferrohromnyń – 12 tómendeýi korporatıvtik tabys salyǵynyń azıýyna áserin tıgizdi.

«Úshinshiden, kásipkerlik belsendiliginiń tómendeýine baılanysty ishki taýarlarǵa salynatyn qosylǵan qun salyǵy boıynsha jospar 132 mlrd teńgege oryndalmady. Biraq, qalyptasqan ekonomıkalyq jaǵdaıǵa qaramastan, bıznes aldyndaǵy óz mindettemelerimizdi ýaqtyly oryndadyq. Esepti kezeńde olarǵa 193 mlrd teńge kóleminde qosylǵan qun salyǵy qaıtaryldy. Bul 2019 jyldyń uqsas kezeńimen salystyrǵanda 84 mlrd teńgege kóp. 8-shi sáýirde qabyldanǵan naqtylanǵan respýblıkalyq bıýdjette kirister boıynsha jyldyq jospar 6 trln 414 mlrdteńge somasynda bekitildi. Jergilikti bıýdjeterdiń óz kiristeri 134 mlrd teńgege artyǵymen oryndalyp, 759 mlrd teńgeni qurady. Asyra oryndalý negizinen salyqtar esebinen qalyptasty – 127 mlrd teńge. Barlyq óńirlerde kiristerdiń jospary artyǵymen oryndaldy», - dedi Álıhan Smaıylov.