Respýblıkalyq bıýdjetten bólinetin qosymsha qarjy qaıda jumsalady
«Memleket basshysynyń tapsyrysy boıynsha, bıyl koronavırýspen kúresý, epıdemııalyq jaǵdaıǵa qarsy sharalar úshin respýblıkalyq bıýdjetten qosymsha 125 mlrd teńge qarastyrylǵan. Onyń 40,6 mlrd teńgesi karantın rejıminde densaýlyq saqtaý salasynda jumys istep júrgen qyzmetkerlerdi yntalandyrý úshin, 19,5 mlrd teńge koronavırýs ınfektsııasyn emdeý qyzmeti úshin, koronavırýspen aýyrýy múmkin adamdy aýrýhanaǵa ákelý jáne koronavırýs juqtyrǵan adamdarmen baılanysta bolǵandardy oqshaýlaǵany úshin medıtsınalyq uıymdarǵa beriledi. 14,8 mlrd teńge Nur-Sultan, Almaty, Shymkent qalalaryndaǵy karantın tıpindegi úsh modýldi keshenge beriledi. 30,8 mlrd teńge azyq-túlik, turmystyq jınaqtarǵa bólinedi. Ony tótenshe jaǵdaı kezindegi turǵyndardyń arnaıy tobyna jatatyn 18 jasqa deıingi balalar, І, ІІ, ІІІ top múgedekteri, arnaýly áleýmettik kómek alatyndar, tirkelgen jumyssyzdar jáne múgedek balaǵa qarap otyrǵandar alady. 1 mln adam turmystyq jınaqpen qamtyldy. 8,1 mlrd teńge medıtsınalyq qyzmetshilerge, Qarýly kúshter áskerı qyzmetkerlerine syıaqy retinde beriledi. 4 mlrd teńge baılanys jáne vedomstvoaralyq aqparattyq júıeler qyzmetimen qamtýǵa bólinedi. 1,3 mlrd teńge áleýmettik azyq-túlik zattardy alýǵa jáne blokposttardy qaýipsizdikpen qamtamasyz etýge bólinedi», - deıdi QR Ulttyq ekonomıka mınıstri Rýslan Dálenov.
Sondaı-aq, 225 mln teńge sensorly termometr alýǵa bólinedi.
«200 mln teńge aqparattyq túsindirý jumystaryna bólinedi. Daǵdarysqa qarsy sharalar aıasynda bólinetin barlyq qarjyǵa únemi monıtorıng júrgiziledi», - deıdi ol.
