Respýblıkalyq bıýdjet shyǵystary 2025 jylǵa deıin birtindep ulǵaıtylady

ASTANA. QazAqparat – Respýblıkalyq bıýdjet shyǵystary 2025 jylǵa deıin birtindep ulǵaıtylady. Bul týraly Senattyń jalpy otyrysynda eldiń 2023-2027 jyldarǵa arnalǵan áleýmettik-ekonomıkalyq damýynyń boljamy jaıynda baıandaǵan QR Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Respýblıkalyq bıýdjet shyǵystary 2023 jylǵy 21,0 trln teńgeden 2025 jyly 22,6 trln teńgege deıin birtindep ulǵaıýymen boljanýda. Jalpy ishki ónimge qatysty olardyń 2023 jyly 17,4 paıyzdan 2024-2025 jyldary 16 paıyzǵa deıin tómendeýi boljanady», - dedi Álibek Qýantyrov.

Onyń atap ótýinshe, kontrtsıkldyq bıýdjet qaǵıdasyn qoldaný respýblıkalyq bıýdjet shyǵystarynyń ósý qarqynyn josparly kezeńde jalpy ishki ónimge qatysty 16,4 paıyz deńgeıinde turaqtandyrýdy qamtamasyz etedi.

«Osy shyǵystar lımıti aıasynda strategııalyq jáne bıýdjettik josparlaýdyń ózara baılanysyn birtindep kúsheıte otyryp, shyǵystardy áleýmettik-ekonomıkalyq damýdyń basym baǵyttaryna shoǵyrlandyrý qamtamasyz etiledi. Bıýdjet parametrleriniń shynaıylyǵyn kúsheıtý boıynsha qabyldanatyn is-sharalardy eskere otyryp, bıýdjet tapshylyǵy jalpy ishki ónimge qatysty 2023 jyly 2,7 paıyz deńgeıinde, odan ári 2024-2025 jyldary tıisinshe 2,6 jáne 2,5 paıyzǵa deıin tómendete otyryp aıqyndaý usynylady. Munaıǵa qatysty emes tapshylyq jalpy ishki ónimge qatysty 2023 jyly 6,8 paıyzdan 2025 jyly 5,3 paıyzǵa deıin tómendeýi boljanady. Bul Ulttyq damý josparynyń mánine sáıkes keledi», - dedi mınıstr.