Respýblıkalyq bıýdjet shyǵystary 1,5 trln teńgege ulǵaıtylmaq
«Prezıdenttiń saılaýaldy baǵdarlamasy men qyrkúıek aıyndaǵy Joldaýyn qamtamasyz etý boıynsha Úkimet aldyna qoıylǵan mindetterdi iske asyrý úshin 2023 jylǵa arnalǵan bıýdjet parametrlerin naqtylaý usynylady. Bul rette 2023 jyly respýblıkalyq bıýdjettiń kiristeri bekitilgen jospardan 720 mlrd teńgege ósimmen JІÓ-ge 12,1 paıyz deńgeıin quraıdy. Respýblıkalyq bıýdjetke túsetin qosymsha túsimder kiris bazasyn keńeıtý, salyqtyq jáne kedendik ákimshilendirýdi jaqsartý, tsıfrlandyrý boıynsha Úkimet qabyldap otyrǵan is-sharalar esebinen qamtamasyz etiledi», - dedi vıtse-mınıstr «2023-2025 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańyna ózgerister engizý týraly» zań jobasyn tanystyra keledi.
Azamat Ámrınniń dereginshe, bıýdjet kiristeriniń negizgi ósimi bıyl bir jolǵy túsimder esebinen 316 mlrd teńge somasynda kútiledi. Sonymen qatar salyqtyq jáne kedendik ákimshilendirýdi jaqsartý esebinen 404 mlrd teńgege ulǵaıýy kútiledi. Munan basqa bıyl paıdaly qazbalar óndirý salyǵynyń stavkalary ulǵaıtyldy. Osyǵan baılanysty jer qoınaýyn paıdalanýshylardy salyqtyq ákimshilendirý kúsheıtiletin bolady.
«Sondaı-aq ulttyq aýqymdaǵy áleýmettik mańyzy bar jobalardy jáne strategııalyq mańyzdy ınfraqurylymdyq jobalardy qarjylandyrý úshin Ulttyq qordan 800 mlrd teńge kóleminde nysany transfertti qosymsha tartý usynylady. Bıýdjet tapshylyǵyn 3,2 mlrd teńge nemese JІÓ-ge qatysty 2,7 paıyz deńgeıinde saqtaý usynylyp otyr. Osyny eskere otyryp, respýblıkalyq bıýdjettiń shyǵystaryn bekitilgen kólemi 1,5 trln teńgege ulǵaıtylyp, 22,5 trln teńgeni quraıdy», - dedi ol.
